ഡല്ഹി ; രണ്ടാം നരേന്ദ്രമോദി സര്ക്കാരിന്റെ രണ്ടാം വാര്ഷികം ഇന്ന്. കോവിഡ് വ്യാപനത്തിന്റെ പശ്ചാത്തലത്തില് ആഘോഷം വേണ്ടെന്ന് അണികളോട് ബിജെപി അറിയിച്ചു. 5 വര്ഷം അധികാരത്തില് ഇരുന്ന ശേഷം നരന്ദ്ര മോദി ഒറ്റയ്ക്ക് 303 സീറ്റുകള് നേടി അധികാരത്തില് തിരിച്ചു വന്നതാണ്. ബിജെപിക്ക് ഇത് വലിയ വിജയമായിരുന്നു. പുല്വാമയ്ക്കു് ശേഷമുള്ള ദേശീയ വികാരത്തിനൊപ്പം ഉജ്ജ്വലയും ജന്ധനും ഉള്പ്പടെ സാധാരണക്കാരിലേക്കെത്തിയ പദ്ധതികളും വിജയത്തില് വലിയ പങ്കു വഹിച്ചു.
അതേസമയം കൊവിഡ് മഹാമാരിയെത്തുടര്ന്ന് അനാഥരായ കുട്ടികള്ക്കായി പി എം കെയര് ഫോര് ചില്ഡ്രന് പദ്ധതിയുമായി പ്രധാനമന്ത്രി നരേന്ദ്രമോദി. മാതാപിതാക്കളെ നഷ്ടപ്പെട്ട കുട്ടികള്ക്ക് പ്രായപൂര്ത്തി ആവുമ്പോള് പ്രതിമാസ സ്റ്റൈപന്ഡ് നല്കും. ഇവര്ക്ക് 23 വയസാകുമ്പോള് 10 ലക്ഷം രൂപയും നല്കും. പി എം കെയര് ഫണ്ടില് നിന്നാണ് ഈ തുകകള് വകയിരുത്തുക.
കേന്ദ്രത്തിന്റെ ഇന്ഷുറന്സ് പദ്ധതിയില് ഉള്പ്പെടുത്തി 5 ലക്ഷത്തിന്റെ ഇന്ഷുറന്സ് പരിരക്ഷ നല്കും. പത്ത് വയസിന് താഴെയുള്ള കുട്ടികള്ക്ക് അടുത്തുള്ള കേന്ദ്രീയ വിദ്യാലയത്തില് പ്രവേശനം നല്കും. സ്വകാര്യ സ്കൂളില് ആണ് പഠനം എങ്കില് ചെലവ് സര്ക്കാര് വഹിക്കും. 11നും 18നും ഇടയിലുള്ള കുട്ടികള്ക്ക് കേന്ദ്ര സര്ക്കാര് സ്കൂളുകളില് പ്രവേശനം നല്കും.