തിരുവനന്തപുരം: കോവിഡ് ബാധിച്ച് മരിച്ചയാളെ കുടുംബത്തിന്റെ മതപരമായ ആചാരമനുസരിച്ച് സംസ്കരിക്കാമെന്ന് സംസ്ഥാന സര്ക്കാരിന്റെ പുതിയ മാര്ഗനിര്ദേശം. പി പി ഇ കിറ്റുകള് ധരിക്കുന്ന വളരെ കുറച്ച് ബന്ധുക്കളെയും സന്നദ്ധപ്രവര്ത്തകരെയും മാത്രമേ മൃതദേഹം സൂക്ഷിച്ചിരിക്കുന്ന ബാഗില് സ്പര്ശിക്കാനും അത് ശ്മശാനത്തിലേക്ക് കൊണ്ടുപോകാനും അനുവദിക്കുകയുള്ളൂ.
വീട്ടില് കോവിഡ് ബാധിച്ച് ഒരാള് മരിച്ചാല്, തദ്ദേശ സ്വയംഭരണ സെക്രടറിയെയും ആരോഗ്യ പ്രവര്ത്തകരെയും ഉടന് അറിയിക്കണം. ആശുപത്രിയില് വച്ചാണ് മരണം സംഭവിക്കുന്നതെങ്കില്, മൃതദേഹം മരിച്ചയാളുടെ സ്ഥലത്തെ തദ്ദേശ സ്വയംഭരണ സ്ഥാപനത്തിന്റെ സെക്രടറിക്ക് കൈമാറും.
ബന്ധുക്കള് സെക്രടറിക്ക് ഒരു അഭ്യര്ത്ഥന നല്കിയാല്, മൃതദേഹം സംസ്കരിക്കാന് ആഗ്രഹിക്കുന്ന മറ്റേതെങ്കിലും സ്ഥലത്തേക്ക് മൃതദേഹം കൊണ്ടുപോകാം. സെക്രട്ടറി നല്കിയ കത്തിന്റെ അടിസ്ഥാനത്തില് മൃതദേഹം ബന്ധുക്കള്ക്ക് കൈമാറും, ശവസംസ്കാരത്തിനുള്ള ക്രമീകരണങ്ങള് ചെയ്യാന് അധികൃതര് കുടുംബത്തെ സഹായിക്കും.
പരിശോധനാ ഫലങ്ങള്ക്കായി കാത്തിരിക്കാതെ ശരീരം കൈമാറും. മരിച്ചയാള് ഒരു കോവിഡ് സംശയമുള്ളയാളാണെങ്കിലും, കോവിഡ് പ്രോട്ടോകോളുകള് പ്രകാരം മൃതദേഹം സംസ്കരിക്കും.