മേലാറ്റൂര്: കോവിഡ് കാലത്തെ പ്രതിസന്ധികള്ക്കിടയിലും നിര്ധന യുവതികള്ക്ക് മംഗല്യഭാഗ്യമൊരുക്കി വേങ്ങൂര് എം.ഇ.എ എന്ജിനീയറിങ് കോളജ് വിദ്യാര്ഥികള്. വധുവിന് ഏഴ് പവന് സ്വര്ണാഭരണങ്ങളും വധൂവരന്മാര്ക്കുള്ള വസ്ത്രങ്ങളും വിവാഹെചലവുകളും നല്കിയാണ് ‘മെഹര്’ എന്ന പേരില് ചടങ്ങ് നടത്തുന്നത്. എടപ്പറ്റ ആഞ്ഞിലങ്ങാടി മങ്ങാട്ടുതൊടി ചന്ദ്രെന്റ മകള് അശ്വനിയും തുവ്വൂര് നീലാഞ്ചേരി സ്വദേശി അനീഷും തമ്മിലുള്ള വിവാഹം ശനിയാഴ്ച വധുഗൃഹത്തില് നടന്നു.
എല്ലാ വര്ഷവും കോളജ് ഒാഡിറ്റോറിയത്തില് വിപുലമായാണ് വിവാഹം നടക്കാറുള്ളതെങ്കിലും നിലവിലെ സാഹചര്യത്തില് കോവിഡ് പ്രോട്ടോകോള് പ്രകാരം ലളിതമായി വധുഗൃഹങ്ങളിലാണ് ചടങ്ങ്. ആഞ്ഞിലങ്ങാടി, മണ്ണാര്ക്കാട്, മുക്കം, വയനാട്, പാലക്കാട് കോങ്ങാട് എന്നിവിടങ്ങളിലെ ഒാരോ യുവതികളുടെയും ഗൂഡല്ലൂരിലെ രണ്ടുപേരുടെയും വിവാഹമാണ് വിവിധ ദിവസങ്ങളിലായി ഇൗ വര്ഷം നടക്കുന്നത്.
ഇതുവരെ 51 യുവതികള്ക്കാണ് കോളജ് വിദ്യാര്ഥികള് മംഗല്യഭാഗ്യമൊരുക്കിയത്. വധുഗൃഹത്തില് നടന്ന ചടങ്ങില് എടപ്പറ്റ ഗ്രാമപഞ്ചായത്ത് പ്രസിഡന്റ് സഫിയ വലിയാട്ടില്, വാര്ഡ് അംഗം ജോര്ജ് മാസ്റ്റര്, സ്റ്റാഫ് കോഓഡിനേറ്റര്മാരായ ഷംസുദ്ദീന്, പി. സാഹിറ, നസീബ് നാസര്, സ്റ്റുഡന്റ് കോഓഡിനേറ്റര്മാരായ അബ്ദുറഹ്മാന്, ഫാഹിദ് അലി, മുഹമ്മദ് ഇജാസ്, മുഹമ്മദ് ഫായിസ്, അജ്മല് പര്വേശ്, റസീന തുടങ്ങിയവര് നേതൃത്വം നല്കി.