![“Manju”](https://santhigirinews.org/wp-content/uploads/2020/04/YOUTUBE.jpg")
പാരിസ്: മനുഷ്യ ജീവിതവും വ്യവഹാരങ്ങളും കൂടുതല്‍ ലളിതമാക്കി നിര്‍മിത ബുദ്ധി അഥവാ ആര്‍ടിഫിഷ്യല്‍ ഇന്‍റലിജന്‍സ് നമ്മോടോപ്പം കൂട്ടുകൂടിയിട്ട് ഏറെയായി. സങ്കീര്‍ണത ആവശ്യപ്പെടുന്ന ബൗദ്ധിക ഇടപെടലുകള്‍ക്ക് നിര്‍മിത ബുദ്ധിയുടെ സഹായം കൂടാതെ കഴിയില്ല. എന്നാല്‍, ശരീരത്തിലെ ഏറ്റവും പ്രധാനപ്പെട്ട അവയവമായ ഹൃദയവും കൃത്രിമമായി നിര്‍മിച്ച്‌ ശരീരത്തില്‍ ഘടിപ്പിച്ചാല്‍ പ്രവര്‍ത്തനം സുഗമമാകുമോ? ഹൃദ്രോഗം ലോകത്തുടനീളം മനുഷ്യന് വെല്ലുവിളി ഉയര്‍ത്തുന്ന കാലത്ത് അതും സാധ്യമെന്ന് തെളിയിക്കുകയാണ് ഫ്രഞ്ച് കമ്പനി.
കൃത്രിമ അവയവ നിര്‍മാണ രംഗത്തെ സാന്നിധ്യമായ ഫ്രഞ്ച് കമ്ബനി ‘കാര്‍മറ്റ്’ ആണ് ആദ്യമായി വ്യാവസായികാടിസ്ഥാനത്തില്‍ നിര്‍മിച്ച കൃത്രിമ ഹൃദയം വില്‍പന നടത്തിയത്. രോഗിയുടെ ഹൃദയത്തില്‍ ഇത് ഘടിപ്പിക്കുകയും ചെയ്തു. 2008ല്‍ കമ്ബനി സ്ഥാപിച്ച ശേഷം ആദ്യമായാണ് നിര്‍മിത ഹൃദയം രോഗിയില്‍ ഘടിപ്പിക്കുന്നതെന്നും ഇറ്റാലിയന്‍ നഗരമായ നേപിള്‍സിലെ അസിയന്‍ഡ ഓസ്പെഡലിയറ ആശുപത്രിയില്‍ ഡോ. സിറോ മായല്ലോയുടെ കാര്‍മികത്വത്തില്‍ വെച്ചുപിടിപ്പിക്കല്‍ പൂര്‍ത്തിയായതായും കമ്പനി അറിയിച്ചു.
നിര്‍മിത ഹൃദയ നിര്‍മാണത്തിന് കമ്പനി 2020ല്‍ യൂറോപ്യന്‍ യൂനിയന്‍ ലൈസന്‍സ് നേടിയിരുന്നു. രോഗിക്ക് അഞ്ചു വര്‍ഷം വരെ അധിക ആയുസ്സ് നല്‍കാന്‍ ശേഷിയുള്ളതാണ് കൃത്രിമ ഹൃദയമെന്നാണ് കമ്പനിയുടെ അവകാശവാദം. ഏകദേശം 1.3 കോടിയിലേറെ രൂപയാണ് കൃത്രിമ ഹൃദയത്തിന് ചെലവെന്ന് മാധ്യമങ്ങള്‍ റിപ്പോര്‍ട്ട് ചെയ്തു.
2019ല്‍ 11 രോഗികളില്‍ കമ്പനി നടത്തിയ പരീക്ഷണങ്ങളില്‍ ആറു മാസം വരെ രോഗികള്‍ക്ക് അധിക ആയുസ്സ് ലഭിച്ചെന്നാണ് കണ്ടെത്തല്‍. സാധാരണ മനുഷ്യ ഹൃദയത്തെക്കാള്‍ ഭാരം കൂടുതലാണ് നിര്‍മിത ഹൃദയത്തിന്. ഒരു കിലോയോളം വരും. ഇതിന്റെ മൂന്നിലൊന്നേ മനുഷ്യ ഹൃദയത്തിന് വരൂ. ഇറ്റലിയിലാണ് വില്‍പന നടത്തിയതെങ്കിലും ജര്‍മനി ഉള്‍പെടെ മറ്റു രാജ്യങ്ങളിലും ഭാവിയില്‍ വില്‍പന തകൃതിയാക്കാനാണ് കമ്പനി ലക്ഷ്യമിടുന്നത്.
