മൂലമറ്റം: റിയാന് സലീമിന്റെ വീട്ടിലെത്തിയാല് ഒരു പേ ആന്ഡ് പാര്ക്കിന്റെ പ്രതീതി. നിരവധി ‘വാഹനങ്ങളാ’ണ് ആ വീട്ടിനുള്ളില് പാര്ക്ക് ചെയ്തിരിക്കുന്നത്. കോവിഡിനെ തുടര്ന്ന് പഠനം വീട്ടില് ഒതുങ്ങിയതോടെയാണ് റിയാന് വാഹനങ്ങളുടെ മിനിയേച്ചര് നിര്മാണത്തിലേക്ക് തിരിഞ്ഞത്.
സാങ്കേതിക വിദ്യാഭ്യാസ വകുപ്പില് ജോലിചെയ്യുന്ന കാഞ്ഞാര് ലബ്ബവീട്ടില് സലീമിന്റെയും ഭക്ഷ്യസുരക്ഷ വകുപ്പില് റിസര്ച്ച് ഒാഫീസറായ വിഫ്സിയുടെയും മകനായ റിയാന് നല്ലൊരു ചിത്രകാരന്കൂടിയാണ്. കാര്ഡ് ബോര്ഡില് ആദ്യമായി ഒരു പിക്അപ് ജീപ്പ് നിര്മിച്ചു. ഒറിജിലിനെ വെല്ലുന്ന ഈ കുഞ്ഞന് ജീപ്പ് വീട്ടുകാരെ അത്ഭുതപ്പെടുത്തി. അയല്വാസികളും ബന്ധുക്കളും പിന്തുണയുമായി എത്തി. മാതാപിതാക്കളുടെയും സഹോദരി സഫ്നയുടെയും പൂര്ണ പിന്തുണ കൂടിയായപ്പോള് ഉത്സാഹമേറി.
തുടര്ന്ന് തടിലോറി, കെ.എസ്.ആര്.ടി.സി ബസ്, താര് ജീപ്പ് എന്നിവയുടെയും ചെറുരൂപങ്ങള് നിര്മിച്ചു. കെ.എസ്.ആര്.ടി.സി ബസ് നിര്മാണമാണ് ഏറ്റവും ശ്രമകരമെന്ന് റയാന് പറയുന്നു. ബസിന്റെ ഉള്ഭാഗങ്ങളിലെ രൂപകല്പനക്കും സീറ്റുകള് ഘടിപ്പിക്കാനുമാണ് കൂടുതല് സമയം വേണ്ടിവന്നത്.
യഥാര്ഥ വാഹനങ്ങളുടെ എല്ലാ ഭാഗങ്ങളും അതേപടി പകര്ത്തിയാണ് മിനിയേച്ചര് ഒരുക്കിയത്. പഴയ കാര്ഡ്ബോര്ഡ് പെട്ടികളില് പശയും പെയ്ന്റും ഉപയോഗിച്ചാണ് നിര്മാണം. കത്രികയാണ് നിര്മാണത്തിന് ഉപയോഗിക്കുന്ന ഏക ആയുധം. ചെറുരൂപങ്ങള് ആയതിനാല് പെയിന്റിങ്ങിന് ഏറെ ശ്രദ്ധ ആവശ്യമാണ്. പരീക്ഷ തിരക്കുകള് കഴിഞ്ഞാല് കൂടുതല് ചെറുരൂപങ്ങള് നിര്മിക്കാനാണ് പദ്ധതി. എറണാകുളം കടവന്ത്ര കേന്ദ്രീയ വിദ്യാലയത്തിലെ ആറാംക്ലാസ് വിദ്യാര്ഥിയായ റിയാന് തന്റെ സര്ഗാത്മകത ജനങ്ങളിലേക്ക് എത്തിക്കാന് യൂടൂബ് ചാനലും ആരംഭിച്ചിട്ടുണ്ട്.