അറേബ്യന് ഗള്ഫ് കപ്പ് ഫുട്ബാള് ടൂര്ണമെന്റ് 2023 ല്
കുവൈത്ത് സിറ്റി: ഡിസംബറില് ഇറാഖിലെ ബസറയില് നടത്താന് തീരുമാനിച്ച അറേബ്യന് ഗള്ഫ് കപ്പ് ഫുട്ബാള് ടൂര്ണമെന്റ് 2023 ലേക്ക് മാറ്റി വച്ചു. അറബ് ഗള്ഫ് കപ്പ് ഫെഡറേഷന് മേധാവി ജാസിം അല് റുമൈഹി അറിയിച്ചതാണിക്കാര്യം.
കോവിഡ് പശ്ചാത്തലവും ടീമുകള്ക്ക് തിരക്കേറിയ ഷെഡ്യൂള് ആയതും കണക്കിലെടുത്താണ് ടൂര്ണമെന്റ് മാറ്റിവെക്കാന് തീരുമാനിച്ചത്. 25ാമത് എഡിഷനാണ് ഇനി നടക്കാനുള്ളത്. കുവൈത്ത്, ഖത്തര്, യു.എ.ഇ, ഒമാന്, ബഹ്റിന് , സൗദി, ഇറാഖ്, യമന് ടീമുകളാണ് മത്സരിക്കുക. അതെ സമയം കഴിഞ്ഞ തവണ ബഹ്റൈന് ജേതാക്കളും സൗദി രണ്ടാം സ്ഥാനക്കാരുമായിരുന്നു.
ടൂര്ണമെന്റിന്റെ ചരിത്രത്തില് ഏറ്റവും കൂടുതല് തവണ വിജയികളായിട്ടുള്ളത് കുവൈത്ത് ആണ്. 1970, 1972, 1974, 1976, 1982, 1986, 1990, 1996, 1998, 2010 വര്ഷങ്ങളില് ജേതാക്കളായ കുവൈത്ത് ഇപ്പോള് മുന്നിലാണ്.