പുനലൂര്: കഴിഞ്ഞ ഒന്നരവര്ഷമായി കൊല്ലം-ചെങ്കോട്ട റൂട്ടില് നിര്ത്തിവെച്ചിരിക്കുന്ന പാസഞ്ചര് ട്രെയിനുകള് പുനരാരംഭിക്കണമെന്ന് ആവശ്യം. കോവിഡ് നിയന്ത്രണങ്ങളില് ഇളവുകള് വന്നിട്ടും യാത്രക്കാരുടെ ആവശ്യം പരിഗണിച്ച് പാസഞ്ചര് സര്വിസുകള് നടത്താന് റെയില്വേ തയാറാവുന്നില്ല. നിലവില് നൂറുകണക്കിന് സ്ഥിരം യാത്രക്കാര് പാസഞ്ചര് ട്രെയിനുകളില്ലാത്തതിനാല് ബുദ്ധിമുട്ടുകയാണ്.
ആര്യങ്കാവ്, തെന്മല, ഇടമണ്, പുനലൂര്, കുന്നിക്കോട്, കൊട്ടാരക്കര തുടങ്ങിയ ഭാഗങ്ങളില് നിന്നും നൂറുകണക്കിന് വിദ്യാര്ഥികളാണ് ട്രെയിന് സര്വിസിനെ ആശ്രയിക്കുന്നത്. കൊല്ലത്തും പരിസരത്തുമുള്ള പ്രൊഫഷനല് കോളജുകളിലുള്പ്പെടെ നിരവധി വിദ്യാര്ഥികള് കിഴക്കന് മേഖലയില് നിന്നും പോയിവരുന്നുണ്ട്. കൂടാതെ ചെങ്കോട്ട, തെങ്കാശി ഭാഗങ്ങളിലെ കോളജുകളിലും ഇവിടെനിന്ന് ദിവസവും കുട്ടികള് പോവുന്നു.
നിലവില് ഇവര്ക്ക് സൗകര്യമായ ട്രെയിനുകള് ഇല്ലാത്തത് കാരണം കെ.എസ്.ആര്.ടി.സി അടക്കം ബസുകളില് വലിയ ടിക്കറ്റ് ചാര്ജ് നല്കിയാണ് യാത്ര.
മുമ്പ് ട്രെയിന് സര്വിസിനെ ആശ്രയിച്ചുവന്ന സര്ക്കാര് ജീവനക്കാരും ബുദ്ധിമുട്ടനുഭവിക്കുന്നു. കോവിഡ് നിയന്ത്രണങ്ങള് കാരണം ഇവിടെ നിന്നും തമിഴ്നാട്ടിലേക്കും തിരിച്ചും ബസ് സര്വിസുകള് ഇല്ലാത്തതും കിഴക്കന്മേഖലയിലേക്കുള്ള യാത്ര ഇരട്ടിദുരിതമാകുന്നു. വിദ്യാര്ഥികളടക്കമുള്ളവരുടെ സൗകര്യാര്ഥം പുനലൂര് നിന്നും കൊല്ലത്തേക്കും തിരിച്ചും ചെങ്കോട്ടയിലേക്കും മറ്റും രാവിലെയും വൈകീട്ടും പാസഞ്ചര് ട്രെയിനുകള് മുമ്പുണ്ടായിരുന്നു.