കൊല്ലം: ഇന്ധന, പാചകവാതക വിലവര്ധനക്ക് പിന്നാലെ മണ്ണെണ്ണ വിലയും കുത്തനെ ഉയര്ത്തിയത് മത്സ്യത്തൊഴിലാളികള്ക്ക് ഇടിത്തീയായി.
പരമ്പരാഗത മത്സ്യത്തൊഴിലാളികളില് പലര്ക്കും ആദ്യം പണമടയ്ക്കണമെന്ന വ്യവസ്ഥയുള്ളതിനാല് സബ്സിഡി മണ്ണെണ്ണ വാങ്ങാന് കഴിയില്ല. സബ്സിഡി പിന്നീടാണ് അക്കൗണ്ടിലെത്തുന്നത്. ഇത്തരം സാഹചര്യത്തില് സബ്സിഡി മണ്ണെണ്ണ കരിഞ്ചന്തക്കാര് കൊണ്ടുപോകാറാണ് പതിവ്. ഒരു മാസം ശരാശരി 100 ലിറ്റര് മണ്ണെണ്ണവരെയാണ് സിവില് സപ്ലൈസ് വകുപ്പ് വഴി നല്കിയിരുന്നത്. മത്സ്യഫെഡ് വഴി 140 ലിറ്ററും ലഭിക്കും. നിലവില് സിവില് സപ്ലൈസ് 44.50 രൂപക്കും മത്സ്യഫെഡ് 25 രൂപ സബ്സിഡി അടക്കം 103.8 രൂപക്കുമാണ് മണ്ണെണ്ണ നല്കുന്നത്. വര്ധന വന്നതോടെ വിലയില് മാറ്റംവരും. ചെറിയ വള്ളങ്ങള്ക്ക് ദിവസം കടലില് പോകാന് 50-60 ലിറ്റര് മണ്ണെണ്ണ വേണ്ടിവരും.
വിപണിയില് മണ്ണെണ്ണ വില കൂടിയിട്ടും സബിസിഡി നിരക്ക് വര്ധിപ്പിച്ചിട്ടില്ല. സബ്സിഡി വിതരണം ഇടക്കിടക്ക് മുടങ്ങുന്നെന്നും മത്സ്യത്തൊഴിലാളികള് പറയുന്നു. മത്സ്യലഭ്യത വളരെ കുറഞ്ഞ സാഹചര്യത്തില് മണ്ണെണ്ണ വലിയ വിലയ്ക്ക് പുറത്തുനിന്ന് വാങ്ങി മത്സ്യബന്ധനം നടത്തുന്നവര്ക്ക് കനത്ത നഷ്ടമാണ് നേരിടേണ്ടിവരുന്നത്. വിലക്കയറ്റത്തിനനുസരിച്ച് സബ്സിഡിയില് മാറ്റം വരുത്തണമെന്ന ആവശ്യം ഉയര്ന്നിട്ടുണ്ട്. കൊല്ലം തീരത്ത് ശരാശരി 600 വള്ളങ്ങളാണ് ദിനംപ്രതി മത്സ്യബന്ധനത്തിന് പോയിവരുന്നത്. പ്രതികൂല സാഹചര്യങ്ങള് ഓരോന്നായി വരുന്ന സാഹചര്യത്തില് പരമ്പരാഗത മത്സ്യത്തൊഴിലാളികള് അടക്കം ആശങ്കയിലാണ്.