ന്യൂഡല്ഹി: കൂനൂര് ഹെലികോപ്റ്റര് അപകടത്തില് ജീവന് പൊലിഞ്ഞ ബ്രിഗേഡിയര് എല്.എസ്.ലിഡ്ഡര്ക്ക് വിട നല്കി രാജ്യം. പ്രതിരോധമന്ത്രി രാജ്നാഥ് സിംഗ് അദ്ദേഹത്തിന് ആദരാഞ്ജലി അര്പ്പിച്ചു. ഡല്ഹിയിലെ ബ്രാര് സ്ക്വയര് ശ്മശാനത്തിലെത്തിയാണ് അദ്ദേഹം അന്ത്യാഞ്ജലി അര്പ്പിച്ചത്.
ബ്രാര് സ്ക്വയര് ശമശാനത്തിലാണ് ലിഡ്ഡറുടെ മൃതദേഹം സംസ്കരിക്കുന്നത്. കരസേന മേധാവി ജനറല് എം.എം. നരവനെ, ദേശീയ സുരക്ഷാഉപദേഷ്ടാവ് അജിത്ത് ഡോവല്, നാവികസേന മേധാവി അഡ്മിറല് ആര്.ഹരികുമാര്, വ്യോമസേന മേധാവി എയര്ചീഫ് മാര്ഷല് വി.ആര്. ചൗധരി, ഹരിയാന മുഖ്യമന്ത്രി മനോഹര്ലാല് ഖട്ടര് തുടങ്ങിയവരും അദ്ദേഹത്തിന് അന്ത്യമോപചാരം അര്പ്പിച്ചു.
ഹരിയാണയിലെ പഞ്ച്കുള സ്വദേശിയാണ് ബ്രിഗേഡിയര് ലഖ്ബിന്ദര് സിങ് ലിഡ്ഡെര്. വിട വാങ്ങിയ സംയുക്ത സേനാ മേധാവി ജനറല് ബിപിന് റാവത്തിനൊപ്പം ഒരുവര്ഷമായി സൈനിക പരിഷ്കരണങ്ങളില് ഒപ്പം പ്രവര്ത്തിച്ച അദ്ദേഹം പുതിയ ചുമതല ഏറ്റെടുക്കാന് തയ്യാറെടുക്കുന്നതിനിടെയാണ് അപകടമരണം.
1990 ലാണ് ജമ്മു കശ്മീര് റൈഫിള്സില് സേവനനിരതനായത് . ഇന്ത്യയുടെ കസാഖ്സ്താനിലെ സൈനിക നടപടിയില് പ്രധാന പങ്കുവഹിച്ചിട്ടുള്ള അദ്ദേഹത്തിന് സേനാമെഡല്, വിശിഷ്ട സേവാ മെഡല് തുടങ്ങിയവ ലഭിച്ചിട്ടുണ്ട്. അതെ സമയം സംയുക്ത സേനാ മേധാവി ബിപിന് റാവത്തിന്റേയും ഭാര്യ മധുലിക റാവത്തിന്റെ സംസ്കാര ചടങ്ങുകളും ഇന്ന് നടക്കും.