മൈസൂരു: അഞ്ചാമത് ദേശീയ കടുവ സെന്സസ് കര്ണാടകത്തില് ആരംഭിച്ചു. ശനിയാഴ്ച ചാമരാജനഗറിലെ ബന്ദിപ്പുര് കടുവ സംരക്ഷണകേന്ദ്രത്തിലാണ് സെന്സസിന് തുടക്കംകുറിച്ചത്. ഞായറാഴ്ച സംസ്ഥാനത്തെ മറ്റു നാല് കടുവ സംരക്ഷണകേന്ദ്രങ്ങളിലും സെന്സസ് ആരംഭിക്കും.നാഗര്ഹോളെ (മൈസൂരു-കുടക്), ബിലിഗിരി രംഗനാഥസ്വാമിക്ഷേത്ര (ചാമരാജനഗര്), ഭദ്ര (ചിക്കമഗളൂരു), കാളി (ഉത്തര കന്നഡ) എന്നിവയാണ് മറ്റു കടുവ സംരക്ഷണകേന്ദ്രങ്ങള്.
ബന്ദിപ്പുരില് മൂന്നുഘട്ടങ്ങളായി നടക്കുന്ന സെന്സസ് ഫെബ്രുവരി എട്ടിന് അവസാനിക്കും. വനപാലകര്, വന്യജീവി വിദഗ്ധര് എന്നിവരുള്പ്പെടെ 300-ലധികംപേരാണ് സെന്സസില് പങ്കെടുക്കുന്നത്. കോവിഡ് മഹാമാരി കാരണം വൊളന്റിയര്മാരെ ഉള്പ്പെടുത്തിയിട്ടില്ല. നാലുവര്ഷത്തിലൊരിക്കലാണ് ദേശീയ കടുവ സെന്സസ്. 1996, 2000, 2014, 2018 എന്നീ വര്ഷങ്ങളിലാണ് മുമ്പ് സെന്സസ് നടന്നത്. ഏറ്റവുമൊടുവിലെ സെന്സസില് 173 കടുവകളെയാണ് ബന്ദിപ്പുരില് കണ്ടെത്തിയിരിക്കുന്നത്.