മനുഷ്യനെ​ വീണ്ടും ച​ന്ദ്രനിലെത്തിക്കാന്‍ നാസ

വാഷിങ്​ടണ്‍:  മനുഷ്യനെ​ വീണ്ടും ച​ന്ദ്രനിലെത്തിക്കാന്‍ നാസ; പങ്കാളിയായി ഇലോണ്‍ മസ്​കിന്റെ സ്​പേസ്​ എക്​സ്​
ചാന്ദ്ര പേടകം സ്​പേസ്​ എക്​സ്​ നിര്‍മിക്കും. അഞ്ചു പതിറ്റാണ്ടിന്‍റെ ഇടവേളക്കു ശേഷം മനുഷ്യനെ വീണ്ടും ചന്ദ്രനിലെത്തിക്കാനുള്ള നാസ പദ്ധതിയില്‍ സ്വകാര്യ പങ്കാളിത്തമായി ഇലോണ്‍ മസ്​കിന്റെ സ്​പേസ്​ എക്​സും. നേരത്തെ പ്രഖ്യാപിച്ച ശതകോടികളുടെ ‘ആര്‍ടെമിസ്​’ പദ്ധതിയില്‍ യാത്ര പുറപ്പെടാനുള്ള വാഹനം നിര്‍മിക്കാന്‍ ബഹിരാകാശ രംഗത്തെ വന്‍വ്യവസായി ഇലോണ്‍ മസ്​കിന്​ 290 കോടി ഡോളറിന്റെ (21,616 കോടി രൂപ) കരാറാണ്​ നല്‍കിയിരിക്കുന്നത്​.
ആളുകളെ കൂട്ടമായി ബഹിരാകാശത്തെത്തിക്കുന്ന വാഹനം മസ്​കിന്റെ  സ്പേസ്​ എക്​സ്​ ഒരുക്കി തുടങ്ങിയിട്ട്​ വര്‍ഷങ്ങ​ളേറെയായി. അവ ഇനിയും വിജയം കണ്ടിട്ടില്ലെങ്കിലും വൈകാതെ സാധ്യമാകുമെന്ന്​ മസ്​ക്​ പറയുന്നു.
ഇതിനിടെയാണ്​ ചന്ദ്രനിലേക്ക്​ മനുഷ്യരെയുമായി നാസയും സ്​പേസ്​ എക്​സും ചേര്‍ന്ന്​ പറക്കാനൊരുങ്ങുന്നത്​. ഇതു​വരെയും സര്‍ക്കാര്‍ സംരംഭങ്ങളായിരുന്ന ബഹിരാകാശ യാ​ത്രയും ചാന്ദ്ര യാത്രയും സ്വകാര്യ മേഖലയുടെ പിടിയിലമരുന്നതിന്‍റെ സൂചന കൂടിയാണ്​ നാസയുടെ പുതിയ പ്രഖ്യാപനം.
ഇതേ പദ്ധതിയുടെ ഭാഗമാകാന്‍ നേരത്തെ ആമസോണ്‍ ഉടമ ജെഫ്​ ബിസോസിന്‍റെ ബ്ലൂ ഒറിജിന്‍, പ്രതിരോധ രംഗത്തെ ഡൈനറ്റിക്​സ്​ എന്നിവരും രംഗത്തുണ്ടായിരുന്നുവെങ്കിലും നാസ തള്ളി. ​അപ്പോളോ കാലത്തെ അപേക്ഷിച്ച്‌​ 13 ശതമാനം മാത്രം ചെലവില്‍ പദ്ധതി വിജയകരമാക്കാമെന്നാണ്​ അവകാശവാദം​.
നാസയുടെ ആര്‍ടെമിസ്​ പദ്ധതിക്കു കീഴില്‍ സ്​പസ്​ ലോഞ്ച്​ സംവിധാനം, ഓറിയോണ്‍ ബഹിരാകാശ പേടകം എന്നിവയും നിര്‍മിക്കും. ആദ്യമായി വനിതകളെയും കറുത്ത വംശജരെയും ചന്ദ്രനിലെത്തിക്കാനും ആര്‍ടെമിസ്​ ലക്ഷ്യമിടുന്നുണ്ട്​.
2024 ഓടെ മനുഷ്യനെ വീണ്ടും ചന്ദ്രനിലെത്തിക്കുമെന്നായിരുന്നു നേരത്തെ പദ്ധതിയെങ്കിലും യു.എസ്​ ഭരണകൂടം​ ഫണ്ട്​ വെട്ടിക്കുറച്ചതോടെ അനന്തമായി നീളുകയായിരുന്നു.
നാസക്ക് മാത്രം 2470 കോടി ഡോളര്‍ ഫണ്ട്​ അനുവദിക്കണമെന്ന്​ ജോ ബൈഡന്‍ യു.എസ്​ കോണ്‍ഗ്രസില്‍ ആവശ്യമുന്നയിച്ചിട്ടുണ്ട്​.
2011ല്‍ ബഹിരാകാശ പേടകങ്ങള്‍ പൂര്‍ണമായി നിലത്തിറക്കിയ ശേഷം ഇതുവരെയും അമേരിക്കക്ക്​ മനുഷ്യരെ അയക്കാനായിട്ടില്ല. അതിനു ശേഷം രണ്ടു തവണ ബഹിരാകാശ നിലയത്തിലേക്ക്​ സ്വകാര്യ സ്​ഥാപനമായ സ്​പേസ്​ എക്​സ്​ ആളെ എത്തിച്ചിട്ടുണ്ട്​. ഏപ്രില്‍ 22ന്​ മൂന്നാം സംഘം പുറപ്പെടും.
1969ല്‍ അപ്പോളോ 11 ആയിരുന്നു ആദ്യമായി മനുഷ്യനെ ചന്ദ്രനിലെത്തിച്ചത്​. 1972നു ശേഷം ഇതുവരെയും മനുഷ്യന്‍ ചന്ദ്രനില്‍ കാലുകുത്തിയിട്ടില്ല.