സ്വയം ഭീകരവാദിയെന്ന് പ്രഖ്യാപിച്ച് പോലീസ് സ്റ്റേഷന് മുന്നിൽ തീ കൊളുത്തി യുവാവ്

താനെ: സ്വയം ഭീകരവാദിയെന്ന് പ്രഖ്യാപിച്ച് പോലീസ് സ്റ്റേഷന് മുന്നിൽ വെച്ച് ദേഹത്ത് തീകൊളുത്തിയ യുവാവ് ആശുപത്രിയിൽ. 25 ശതമാനം പൊള്ളലേറ്റ നിയാസ് അഹമ്മദ് മൊയ്നുദ്ദീൻ എന്നയാളാണ് ഗുരുതരമായ പരിക്കുകളോടെ ആശുപത്രിയിൽ പ്രവേശിപ്പിക്കപ്പെട്ടിരിക്കുന്നത്. മഹാരാഷ്‌ട്രയിലെ താനെയിലായിരുന്നു സംഭവം.

സംഭവ സമയത്ത് നിയാസ് മദ്യപിച്ചിരുന്നതായി പോലീസ് സ്ഥിരീകരിച്ചു. താൻ ഭീകരവാദിയാണെന്നും ശഹീദ് ആകാൻ പോവുകയാണെന്നും പോലീസിനെ ഫോണിലൂടെ അറിയിച്ച ശേഷം ഉച്ചയ്‌ക്ക് ഒരു മണിയോടെയായിരുന്നു നാർപോളി പോലീസ് സ്റ്റേഷന് മുന്നിൽ യുവാവിന്റെ അതിക്രമം.

സർക്കാർ ആശുപത്രിയിൽ ചികിത്സയിൽ കഴിയുന്ന നിയാസ് അഹമ്മദ് മൊയ്നുദ്ദീനെതിരെ ആത്മഹത്യ ശ്രമത്തിന് കേസ് എടുത്തതായി പോലീസ് അറിയിച്ചു. സംഭവത്തിൽ വിശദമായ അന്വേഷണം നടത്തുമെന്നും മഹാരാഷ്‌ട്ര പോലീസ് വ്യക്തമാക്കി.