മുന്നറിയിപ്പുമായി മന്ത്രാലയം
ദോഹ: നെതര്ലന്ഡ്സില്നിന്ന് ഇറക്കുമതി ചെയ്യുന്ന ഹോളണ്ട്സ് ഗ്ലോറി ബ്രാന്ഡ് ചീര, അരുഗുല എന്നീ ഇലക്കറി ഉല്പന്നങ്ങളില് ഇ-കോളി ബാക്ടീരിയയുടെ സാന്നിധ്യമുണ്ടാകാന് സാധ്യതയുള്ളതിനാല് പൊതുജനങ്ങള്ക്ക് മുന്നറിയിപ്പുമായി പൊതുജനാരോഗ്യ മന്ത്രാലയം. ഈ ഉല്പന്നങ്ങളുമായി ബന്ധപ്പെട്ട് യൂറോപ്യന് റാപ്പിഡ് അലര്ട്ട് സിസ്റ്റം ഫോര് ഫുഡ് ആന്ഡ് ഫീഡ് നിരീക്ഷിച്ചിട്ടുണ്ടെന്നും ആരോഗ്യ മന്ത്രാലയം പ്രസ്താവനയില് പറഞ്ഞു. ആവശ്യമായ മുന്കരുതലെന്ന നിലയില് വിപണിയില് നിന്നുള്ള അറിയിപ്പിനെ തുടര്ന്ന് പ്രസ്തുത ഉല്പന്നങ്ങള് ഉടനടി പിന്വലിക്കാന് വിതരണക്കാര്ക്ക് നിര്ദേശം നല്കിയിട്ടുണ്ടെന്നും മന്ത്രാലയം ചൂണ്ടിക്കാട്ടി. കൂടുതല് മുന്കരുതല് നടപടികള് സ്വീകരിക്കുന്നതിന്റെ ഭാഗമായി ബന്ധപ്പെട്ട വില്പന കേന്ദ്രങ്ങള് ഉല്പന്നങ്ങളില് നിന്ന് മുക്തമാണെന്ന് പരിശോധിക്കാനും ഉറപ്പുവരുത്താനും മന്ത്രാലയത്തിന് കീഴിലെ ഇന്സ്പെക്ടര്മാര്ക്ക് നിര്ദേശവും നല്കിയിട്ടുണ്ടെന്നും മന്ത്രാലയം വ്യക്തമാക്കി.