പത്തനംതിട്ട: പട്ടാഴിമുക്കില് കാര് ലോറിയിലേക്ക് ഇടിച്ചു കയറി രണ്ട് പേരുടെ മരണത്തിന് ഇടയാക്കിയ സംഭവത്തില് ദുരൂഹത നീക്കാന് ശാസ്ത്രീയ അന്വേഷണത്തിന് പൊലീസ്. അനുജയുടെയും ഹാഷിമിന്റെയും മൊബൈല് ഫോണുകളിലെ വിവരങ്ങള് പൊലീസ് വീണ്ടെടുക്കും. കോട്ടയം മെഡിക്കല് കോളേജിലെ പോസ്റ്റ്മോര്ട്ടത്തിനു ശേഷം രാസ പരിശോധനയ്ക്ക് ആവശ്യമായ സാമ്പിളുകള് മരിച്ച രണ്ട് പേരുടെയും മൃതദേഹങ്ങളില് നിന്ന് ശേഖരിച്ചു.
വാഹനാപകടം നടന്ന സമയത്ത് ഇരുവരും ഉപയോഗിച്ചിരുന്ന മൊബൈല് ഫോണുകളും പൊലീസ് കണ്ടെടുത്തിട്ടുണ്ട്. എന്നാല് ലോക്കുണ്ടായിരുന്നതിനാല് വിവരങ്ങള് ശേഖരിക്കാന് കഴിഞ്ഞിരുന്നില്ല. ഈ സാഹചര്യത്തില് ഫോറന്സിക് ലാബിലേക്ക് വിദഗ്ധ പരിശോധനയ്ക്ക് ഫോണുകള് അയക്കും. വാട്സാപ്പ് ചാറ്റുകള് ഉള്പ്പെടെ വീണ്ടെടുക്കാനാണ് ശ്രമം. കാര് യാത്രികരായ തുമ്പമണ് സ്വദേശിനി അനുജ, ചാരുമൂട് സ്വദേശി ഹാഷിം എന്നിവരാണ് അപകടത്തില് മരിച്ചത്. വിനോദയാത്ര കഴിഞ്ഞ് മടങ്ങിവരികയായിരുന്ന അനുജയെ ട്രാവലര് തടഞ്ഞുനിര്ത്തിയാണ് ഹാഷിം കാറില് കയറ്റിക്കൊണ്ടുപോയതെന്ന് പൊലീസ് പറഞ്ഞു.
എന്തിനാവും മനഃപൂര്വം മരണത്തിലേക്ക് കാര് ഓടിച്ചു കയറ്റിയെന്നതാണ് പൊലീസിന് മുന്നില് ഉയരുന്ന ചോദ്യം. തുമ്പമണ് നോര്ത്ത് ജിഎച്ച്എസ്എസിലെ അധ്യാപികയായിരുന്നു നൂറനാട് സ്വദേശിയായ അനുജ. സ്കൂളിലെ മറ്റ് അധ്യാപകര്ക്കൊപ്പമാണ് അനുജ വിനോദയാത്ര പോയത്. മടങ്ങി വരുന്ന വഴി ഹാഷിം കൂട്ടിക്കൊണ്ട് പോവുകയായിരുന്നു. സംഭവത്തില് മറ്റ് അസ്വാഭാവികതയൊന്നും തോന്നിയില്ലെന്നാണ് കൂടെയുണ്ടായിരുന്ന അധ്യാപകര് പ്രതികരിച്ചത്. മരിച്ച ഹാഷിമിന്റെ മൃതദേഹം കഴിഞ്ഞ ദിവസം രാത്രി തന്നെ സംസ്കരിച്ചു. അനുജയുടെ സംസ്കാരം ഇന്ന് നടക്കും.