കൊച്ചി ; ഗായകനായി സൂപ്പര് സ്റ്റാര് മോഹന്ലാല് 50 ഗാനങ്ങള് പൂര്ത്തിയാക്കുകയാണ് . ടി.കെ. രാജീവ് കുമാര് സംവിധാനം ചെയ്യുന്ന ബര്മുഡ എന്ന ചിത്രത്തിന് വേണ്ടിയാണ് മോഹന്ലാല് അന്പതാമത്തെ ഗാനം പാടുന്നത്. ചിത്രത്തില് ഷെയ്ന് നിഗവും വിനയ് ഫോര്ട്ടുമാണ് പ്രധാന കഥാപാത്രങ്ങളായി എത്തുന്നത്.
വിനായക് ശശികുമാര് എഴുതി രമേഷ് നാരായണ് ഈണമിട്ട പാട്ട് ഈ മാസം അവസാനം മോഹന്ലാല് പാടുമെന്ന് രാജീവ് കുമാര് അറിയിച്ചു. ഇപ്പോള് ഇടുക്കി കുളമാവില് ജിത്തു ജോസഫ് സംവിധാനം ചെയ്യുന്ന 12th MAN എന്ന ചിത്രത്തിലഭിനയിച്ചുവരികയാണ് മോഹന്ലാല്. ഈ ചിത്രം പൂര്ത്തിയാക്കിയ ശേഷം മോഹന്ലാല് ബര്മുഡയിലെ ഗാനമാലപിക്കാന് കൊച്ചിയിലെത്തും.
ബെന്നി ദയാല് ആലപിച്ച കുഞ്ഞുണ്ണി മാഷിന്റെ ഒരു കവിതയും ഹരിചരണും മധുശ്രീയും പാടിയ രണ്ട് ഗാനങ്ങളുമാണ് മോഹന്ലാല് പാടുന്ന പാട്ടിന് പുറമെ ബര്മുഡയിലുള്ളത്. 1985-ല് കണ്ടു കണ്ടറിഞ്ഞു എന്ന ചിത്രത്തിന് വേണ്ടി സി.ഒ. ആന്റോയ്ക്ക് ഒപ്പം നീയറിഞ്ഞോ മേലെ മാനത്ത്, എം.ജി. ശ്രീകുമാറിനൊപ്പം ഒന്നാനാം കുന്നില് ഓരടിക്കുന്നിലെ സിന്ദൂരമേഘം എന്നീ ഗാനങ്ങളാണ് സിനിമയ്ക്ക് വേണ്ടി മോഹന്ലാല് ആദ്യമായി പാടിയത്. ടി.കെ. രാജീവ്കുമാറിന്റെ കണ്ണെഴുതി പൊട്ടും തൊട്ട് എന്ന ചിത്രത്തില് കെ. എസ്. ചിത്രയ്ക്കൊപ്പം കൈതപ്പൂവിന് കന്നിക്കുറുമ്പില് എന്ന ഗാനം പാടിയിട്ടുള്ള മോഹന്ലാല് ഒട്ടേറെ സിനിമേതര ഗാനങ്ങളും ആലപിച്ചിട്ടുണ്ട്.