ശ്രീജ.എസ്
അഞ്ചാമത് എം.എന്.സ്മാരക കാവ്യപുരസ്കാര ജേതാവായ ബൈജുവിന് പുരസ്കാരം നല്കി. യുവ എഴുത്തുകാരെ പ്രോത്സാഹിപ്പിക്കുന്നതിനായി പുരോഗമന കലാസാഹിത്യ സംഘം മാരാരിക്കുളം ഏരിയാ കമ്മിറ്റി ഏര്പ്പെടുത്തിയ പുരസ്കാരം അഡ്വ.എ.എം.ആരിഫ് എം പി ബൈജുവിന് നല്കി.
ഭൂമിയിലെ ഉറവകള് എന്ന പുസ്തകത്തിനാണ് പുരസ്കാരം ലഭിച്ചത്. എം.എന്.കുറുപ്പിന്റെ സ്മരണ നിലനിര്ത്തുന്നതിനായി ഏര്പ്പെടുത്തിയിട്ടുള്ള പുരസ്കാരമാണ് എം.എന്.സ്മാരക കാവ്യപുരസ്കാരം.
എല്ലാ ജില്ലകളില് നിന്നുമായി നൂറില്പ്പരം കവിതകളാണ് വന്നത്. കവി എസ്.രമേശന് ചെയര്മാനായ ജൂറിയില് ഡോ.എസ്.രാജശേഖരന്, ഡോ.എസ്.അജയകുമാര്, ഡോ.സുനില് മാര്ക്കോസ് എന്നിവരായിരുന്നു അംഗങ്ങള്. കവിതകളില് മികച്ച നിലവാരം പുലര്ത്തിയവ ഏറെയുണ്ടായിരുന്നതായി ജൂറി അഭിപ്രായപ്പെട്ടു. തിരൂര്ക്കാട് സ്വദേശിയായ ബൈജു പെരിന്തല്മണ്ണ നഗരസഭ എന്ജിനിയറിംഗ് വിഭാഗത്തില് ആണ് ജോലി ചെയ്യുന്നത്. പതിനായിരത്തി ഒന്ന് രൂപയും ശില്പവും പ്രശസ്തിപത്രവും അടങ്ങുന്നതാണ് സമ്മാനം.