ശ്രീജ.എസ്
ഡല്ഹി : നാവിക സേന കമാന്ഡര്മാരുടെ സമ്മേളനത്തിന് ഇന്ന് ഡല്ഹിയില് തുടക്കം. പ്രതിരോധമന്ത്രി രാജ്നാഥ് സിംഗ് മൂന്ന് ദിവസം നീണ്ടുനില്ക്കുന്ന സമ്മേളനം ഉദ്ഘാടനം ചെയ്യും. അതിര്ത്തിയില് ചൈന പ്രകോപനം തുടരുന്ന സാഹചര്യത്തില് ഇന്ത്യന് മഹാസമുദ്രത്തില് നിരീക്ഷണം ശക്തമാക്കാന് നാവിക സേന തീരുമാനിച്ചിരുന്നു. ഈ സാഹചര്യം സമ്മേളനം വിലയിരുത്തും. ഭരണതലം മുതല് താഴേ തട്ടുവരെയുള്ള പ്രവര്ത്തന രീതിയും ചീഫ് ഓഫ് നേവല് സ്റ്റാഫ് അവലോകനം ചെയ്യും.
അതേ സമയം, ഇന്ത്യ-ചൈന സംഘര്ഷം നിലനില്ക്കുന്ന സാഹചര്യത്തില് പാക്കിസ്ഥാനുമായുള്ള പടിഞ്ഞാറന് അതിര്ത്തിയില് തേജസ് യുദ്ധവിമാനങ്ങള് വിന്യസിച്ചു. ഇന്ത്യ തദ്ദേശീയമായി നിര്മിച്ച ചെറുയുദ്ധവിമാനമാണു തേജസ്. സതേണ് എയര് കമാന്ഡിന്റെ കീഴില് സുളൂര് ആസ്ഥാനമായി 45-ാം സ്ക്വാഡ്രണിനെയാണ് വിന്യസിച്ചിരിക്കുന്നത്. പ്രധാനമന്ത്രി നരേന്ദ്ര മോദി സ്വതന്ത്ര്യദിന പ്രസംഗത്തില് തേജസ് യുദ്ധവിമാനങ്ങളെ പ്രകീര്ത്തിച്ചിരുന്നു. എല്സിഎ മാര്ക്ക് 1 എ പതിപ്പ് വൈകാതെ പൂര്ത്തിയാകുമെന്നും പ്രധാനമന്ത്രി പറഞ്ഞിരുന്നു.