ശ്രീജ. എസ്
ന്യൂഡല്ഹി: ഡല്ഹിയില് കോവിഡ് പരിശോധന നടത്തുന്നതിന് ഡോക്ടറുടെ കുറിപ്പടി ആവശ്യമില്ലെന്ന് മുഖ്യമന്ത്രി അരവിന്ദ് കേജരിവാള്. കോവിഡ് പരിശോധനയ്ക്ക് താത്പര്യപ്പെടുന്നവര്ക്ക് ഡോക്ടറുടെ കുറിപ്പ് നിര്ബന്ധമല്ലെന്ന ഹൈക്കോടതി വിധിക്കു പിന്നാലെയാണ് കേജരിവാളും ഇക്കാര്യം വ്യക്തമാക്കിയത്.
ഡോക്ടറുടെ കുറിപ്പടി കോവിഡ് പരിശോധനയ്ക്കായി ആവശ്യപ്പെടരുതെന്ന് ആരോഗ്യമന്ത്രിയോട് നിര്ദേശിച്ചിട്ടുണ്ട്. ആര്ക്കും സ്വന്തമായി പരിശോധന നടത്താന് സാധിക്കുമെന്നും അദ്ദേഹം ട്വീറ്ററില് കുറിച്ചു. രോഗ ലക്ഷണങ്ങളോ ഡോക്ടറുടെ കുറിപ്പോ ഉള്ളവര്ക്ക് മാത്രമായിരുന്നു ഇതുവരെ കോവിഡ് പരിശോധന നടത്തിയിരുന്നത്.
പരിശോധന നടത്താന് ആഗ്രഹിക്കുന്നവര് ഡല്ഹിയിലെ താമസക്കാരനാണെന്ന് തെളിയിക്കുന്നതിനായി ആധാര് കാര്ഡ് കൈവശം വയ്ക്കുകയും ഇന്ത്യന് കൗണ്സില് ഓഫ് മെഡിക്കല് റിസര്ച്ച് നിര്ദേശിച്ച ഫോം പൂരിപ്പിക്കുകയും വേണമെന്ന് ജസ്റ്റീസ് ഹിമ കോഹ്ലി, സുബ്രഹ്മണ്യം പ്രസാദ് എന്നിവരടങ്ങുന്ന ബഞ്ച് നിര്ദേശിച്ചത്.