![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
വടക്കാഞ്ചേരി: പാതയോരത്തുനിന്ന് സ്വര്‍ണാഭരണങ്ങളുള്ള ബാഗ് കളഞ്ഞുകിട്ടിയപ്പോള്‍ യുവാവിന്റെ കണ്ണ് മഞ്ഞളിച്ചില്ല.സെപ്റ്റംബര്‍ രണ്ടിന് രാവിലെ 11ഓടെ ചെറുതുരുത്തിയില്‍നിന്ന് മിണാലൂരിലേക്ക് കാറില്‍ വരുമ്പോള്‍ വടക്കാഞ്ചേരി ബ്ലോക്ക് ഓഫിസിന് സമീപത്തുനിന്ന് കള്ളിവളപ്പില്‍ ഷാമിലിനാണ് (30) ബാഗ് ലഭിച്ചത്. തുറന്നുനോക്കിയപ്പോള്‍ 10 പവനോളം സ്വര്‍ണാഭരണങ്ങള്‍. ഉടന്‍ ഷാമില്‍ വടക്കാഞ്ചേരി പൊലീസ് സ്റ്റേഷനിലെത്തി ബാഗ് സ്റ്റേഷന്‍ ഹൗസ് ഓഫിസര്‍ കെ. മാധവന്‍കുട്ടിയെ ഏല്‍പിച്ചു.
ബാഗിലെ കുറിപ്പുകളും ബില്ലുകളും പരിശോധിച്ച്‌ നടത്തിയ അന്വേഷണത്തില്‍ കിള്ളിമംഗലം തെക്കുമുറി വിജയകുമാറിന്റെ ഭാര്യ അനുവിന്റേതാണ് സ്വര്‍ണാഭരണങ്ങളെന്ന് പൊലീസ് മനസ്സിലാക്കി. ഓട്ടോയില്‍ യാത്രചെയ്യവേ അവരില്‍നിന്ന് തെറിച്ചുപോയതായിരുന്നു ബാഗ്.
