ഗാന്ധിജിയുടെ പേരക്കുട്ടിയുടെ മകന്‍ കോവിഡ് ബാധിച്ച്‌ മരിച്ചു

സിന്ധുമോൾ. ആർ

ന്യൂഡല്‍ഹി: രാഷ്ട്രപിതാവ് മഹാത്മാ ഗാന്ധിയുടെ പേരക്കുട്ടിയുടെ മകന്‍ കോവിഡ് ബാധിച്ച്‌ മരിച്ചു. ഡര്‍ബനിലെ സാമൂഹ്യപ്രവര്‍ത്തകനായ സതീഷ് ദുപേലിയാണ് മരിച്ചത്. 66 വയസ്സായിരുന്നു. ദക്ഷിണാഫ്രിക്കയില്‍ വെച്ചാണ് കോവിഡ് ബാധിച്ച്‌ മരിച്ചത്. സഹോദരി ഉമ ദുപേലിയയാണ് മരണവിവരം അറിയിച്ചത്. കോവിഡിനെ തുടര്‍ന്ന് ശ്വാസകോശത്തിലുണ്ടായ അണുബാധയും ഹൃദയാഘാതവുമാണ് മരണകാരണമായതെന്ന് സഹോദരി അറിയിച്ചു. ഗാന്ധിജിയുടെ മകന്‍ മണിലാല്‍ ഗാന്ധിയുടെ പേരമകനാണ് സതീഷ്.

സീത-ശശികാന്ത് ദുപേലിയ ദമ്പതികളുടെ മകനാണ് സതീഷ്. ഉമ ദുപേലിയ, കീര്‍ത്തി മേനോന്‍ എന്നിവര്‍ സഹോദരങ്ങളാണ്. ദക്ഷിണാഫ്രിക്കയില്‍ തുടങ്ങിവെച്ച പ്രവര്‍ത്തനങ്ങള്‍ മണിലാല്‍ ഗാന്ധിയെ ഏല്പ്പിച്ചായിരുന്നു ഗാന്ധിജി മടങ്ങിയത്. അതുകൊണ്ട് തന്നെ അദ്ദേഹത്തിന്റെ പിന്തലമുറക്കാര്‍ അവിടെ തന്നെ തുടരുകയായിരുന്നു.