സർക്കാർ ജോലിയിൽ മുന്നോക്ക വിഭാഗങ്ങൾക്ക് സാമ്പത്തിക സംവരണം: ഗസറ്റ് വിജ്ഞാപനമിറങ്ങി
തിരുവനന്തപുരം: സർക്കാർ നിയമനങ്ങളിൽ മുന്നോക്ക സമുദായത്തിൽ സാമ്പത്തികമായി പിന്നോക്കം നിൽക്കുന്നവർക്ക് സംവരണം ഏർപ്പെടുത്തിക്കൊണ്ടുള്ള ഗസറ്റ് വിജ്ഞാപനമിറങ്ങി. സാമ്പത്തികമായി പിന്നോക്കം നിൽക്കുന്ന മുന്നോക്കകാർക്ക് സർക്കാർ ജോലികളിൽ പത്തുശതമാനം സംവരണമേർപ്പെടുത്തിയാണ് വിജ്ഞാപനം. വിജ്ഞാപനമിറങ്ങിയ സാഹചര്യത്തിൽ ഇനിമുതലുള്ള എല്ലാ പിഎസ്സി നിയമനങ്ങൾക്കും സംവരണം ബാധകമാണ്.
സാമ്പത്തിക സംവരണം നടപ്പാക്കുന്നതിനുള്ള ചട്ടഭേദഗതിക്ക് മന്ത്രിസഭായോഗം കഴിഞ്ഞ ദിവസം അംഗീകാരം നൽകിയിരുന്നു. ഒരുവിധ സംവരണത്തിനും അർഹതയില്ലാത്ത മുന്നോക്ക സമുദായങ്ങളിലെ സാമ്പത്തികമായി പിന്നോക്കം നിൽക്കുന്നവർക്ക് പത്തുശതമാനം ഒഴിവുകൾ നീക്കിവയ്ക്കുന്നതിനായാണ് ചട്ടഭേദഗതി. പൊതുവിഭാഗത്തിനായി (ഓപ്പണ് കോന്പറ്റീഷൻ– ഒസി) മാറ്റിവച്ചിട്ടുള്ള 50 ശതമാനത്തിൽ നിന്നാണ് സാമ്പത്തിക സംവരണത്തിനുള്ള പത്തുശതമാനം കണ്ടെത്തുന്നത്.