പാലക്കാട്: പാലക്കാട് നഗരസഭയില് അധ്യക്ഷ തെരഞ്ഞെടുപ്പിനിടെ ബിജെപി അംഗം എല്ഡിഎഫ് സ്ഥാനാര്ത്ഥിക്ക് വോട്ട് ചെയ്തു. ബിജെപി അംഗം വി നടേശനാണ് എല്ഡിഎഫ് സ്ഥാനാര്ത്ഥിക്ക് വോട്ട് ചെയ്തതത്. തുടര്ന്ന്, ചെയ്ത വോട്ട് തിരിച്ചെടുക്കണമെന്ന് നടേശന് വരണാധികാരിയോട് ആവശ്യപ്പെട്ടു. വോട്ട് മാറിപ്പോയതാണെന്നാണ് നടേശന്റെ വാദം. വോട്ട് തിരിച്ചെടുക്കണമെന്ന് ആവശ്യത്തെ കോണ്ഗ്രസ് എല്ഡിഎഫ് അംഗങ്ങള് എതിര്ത്തു.
തുടര്ന്ന് വന് വാക്ക് തര്ക്കത്തിനാണ് കൗണ്സില് ഹാള് സാക്ഷ്യം വഹിച്ചത്. വരണാധികാരിക്ക് മുന്നില് ഇരുപക്ഷവും ചേരിതിരിഞ്ഞ തര്ക്കമായി. ജില്ലാ കളക്ടറുമായി വരണാധികാരി വിഷയം ചര്ച്ച നടത്തി. നടേശന്റെ വോട്ട് സംബന്ധിച്ച് പിന്നീട് തീരുമാനിക്കുമെന്ന വരണാധികാരി അറിയിച്ചെങ്കിലും എല്ഡിഎഫ് കോണ്ഗ്രസ് അംഗങ്ങള് പ്രതിഷേധം തുടര്ന്നു.
52 അംഗ കൗണ്സിലില് ബിജെപിക്ക് 28 അംഗങ്ങളാണുള്ളത്. ഈ സാഹചര്യത്തില് നടേശന്റെ വോട്ട് നിര്ണായകമാവില്ല. എങ്കിലും ഇരുപക്ഷങ്ങളും ഹാളില് കനത്ത ബഹളമാണുണ്ടാക്കിയത്.