ശ്രീജ.എസ്
ബംഗളുരു: കാര്ഷിക നിയമ ഭേദഗതിക്കെതിരായ പ്രക്ഷോഭങ്ങള് തുടരുന്നതിനിടെ, കര്ഷകരില്നിന്നു നേരിട്ടു വിളകള് സംഭരിക്കാന് കരാറിലേര്പ്പെട്ടു കോര്പറേറ്റ് കമ്പനിയായ റിലയന്സ്. കര്ണാടക റായ്ചുര് ജില്ലയിലെ കര്ഷകരില്നിന്നു താങ്ങുവിലയേക്കാള് കൂടുതല് പണം നല്കി നെല്ല് സംഭരിക്കാനാണു റിലയന്സ് റീട്ടെയില് കരാറൊപ്പിട്ടത്.
രാജ്യത്തു വിളകള് സംഭരിക്കുന്നതിനായി ഒരു കോര്പറേറ്റ് കമ്പനി കര്ഷകരുമായി നേരിട്ടേര്പ്പെടുന്ന ആദ്യത്തെ കരാറാണിത്. സിന്ധനൂര് താലൂക്കിലെ കര്ഷകരില്നിന്ന് 1000 ക്വിന്റല് നെല്ല് ഏറ്റെടുക്കാനാണു റിലയന്സ് റീട്ടെയില് ലിമിറ്റഡും നെല്ക്കര്ഷകരുടെ കൂട്ടായ്മയായ സ്വസ്ഥ്യ ഫാര്മേഴ്സ് പ്രൊഡ്യൂസിംഗ് കമ്പനിയും തമ്മില് കരാര് ഒപ്പിട്ടിരിക്കുന്നത്. 1100 കര്ഷകരാണ് സംഘത്തിലുള്ളത്.
ക്വിന്റലിന് 1868 രൂപയായിരുന്നു സര്ക്കാര് പ്രഖ്യാപിച്ച താങ്ങുവില. ഇതിനേക്കാള് 82 രൂപ കൂടുതല് നല്കി 1000 ക്വിന്റല് നെല്ല് സംഭരിക്കുമെന്നാണു കരാര്. എന്നാല്, നെല്ലില് 16 ശതമാനത്തിലധികം ഈര്പ്പമുണ്ടാകരുതെന്നു നിര്ദേശമുണ്ട്. കൂടാത ഓരോ 100 രൂപയുടെ ഇടപാടിനും കര്ഷകര്ക്ക് 1.5 ശതമാനം കമ്മീഷന് നല്കുമെന്നും കരാറില് വ്യക്തമാക്കിയിട്ടുണ്ട്. കഴിഞ്ഞമാസമാണു കര്ണാടകത്തില് സര്ക്കാര് നിയമഭേദഗതി കൊണ്ടുവന്നത്. ഇതോടെ വിളകള് കര്ഷകര്ക്കു നേരിട്ടു സ്വകാര്യ കമ്പനികള്ക്കു വില്ക്കാന് കഴിയും.