![“Manju”](https://santhigirinews.org/wp-content/uploads/2020/04/YOUTUBE.jpg")
ലഖ്നോ: രാഷ്ട്രപിതാവ് മഹാത്മാഗാന്ധി സത്യത്തിന്‍റെയും അഹിംസയുടെയും പൂജാരിയാണെന്ന് യു.പി മുഖ്യമന്ത്രി യോഗി ആദിത്യ നാഥ്. ഗാന്ധിജിയെ നാഥുറാം വിനായക് ഗോഡ്സെ വെടിവെച്ച്‌ കൊന്നതിന്‍റെ വാര്‍ഷിക ദിനത്തില്‍ ആദരാഞ്ജലികള്‍ അര്‍പ്പിച്ചുള്ള ട്വീറ്റിലാണ് യോഗിയുടെ അനുസ്മരണം.
രാവിലെ ലഖ്നോ ജി.പി.ഒ പാര്‍ക്കിലെ മഹാത്മാഗാന്ധിയുടെ പ്രതിമയില്‍ യോഗി പുഷ്പാര്‍ച്ചന നടത്തി. ‘സത്യത്തിന്‍റെയും അഹിംസയുടെയും പൂജാരി, നമുക്കെല്ലാവര്‍ക്കും വഴികാട്ടി, രാഷ്ട്രപിതാവ് മഹാത്മാഗാന്ധിയുടെ ചരമവാര്‍ഷിക ദിനത്തില്‍ ലഖ്നോ ജി.പി.ഒ പാര്‍ക്കിലെ പ്രതിമയില്‍ പുഷ്പാര്‍ച്ചന നടത്തി’ യോഗി ട്വിറ്ററില്‍ കുറിച്ചു.
പ്രധാനമന്ത്രി നരേന്ദ്ര മോദിയും രാഷ്ട്രപതി രാംനാഥ് കോവിന്ദും പ്രതിരോധ മന്ത്രി രാജ്നാഥ് സിങ്ങും ഗാന്ധിജിക്ക് ആദരാഞ്ജലി അര്‍പ്പിച്ചു. ഗാന്ധിയുടെ ആശയങ്ങള്‍ ദശലക്ഷക്കണക്കിന് ആളുകളെ പ്രചോദിപ്പിച്ചുകൊണ്ടിരിക്കുന്നതായി മോദി ട്വീറ്റില്‍ കുറിച്ചു. ഗാന്ധിജി പ്രചരിപ്പിച്ച സമാധാനം, അഹിംസ, ലാളിത്യം, വിശുദ്ധി, വിനയം എന്നിവ ജീവിതത്തില്‍ പാലിക്കണമെന്ന് രാഷ്ട്രപതി രാംനാഥ് കോവിന്ദ് ആഹ്വാനം ചെയ്തു.
അതേസമയം, ഗാന്ധിയെ കൊലപ്പെടുത്തിയ മതഭ്രാന്തന്‍ നാഥുറാം വിനായക് ഗോഡ്സേക്ക് നന്ദി പറഞ്ഞ് ആയിരക്കണക്കിന് ട്വീറ്റുകളുമായി സംഘ്പരിവാര്‍ അനുകൂലികളും രംഗത്തുണ്ട്.
