തിരുവനന്തപുരം: കേരളത്തില് കോവിഡ് വ്യാപനം രൂക്ഷമായിട്ടും പരിശോധനകളുടെ എണ്ണം കൂട്ടാന് സര്ക്കാര് തയാറാകാത്തത് എന്തുകൊണ്ടാണെന്ന് കേന്ദ്ര സംഘം. ആരോഗ്യമന്ത്രിയുമായി നടത്തിയ കൂടിക്കാഴ്ചയിലാണ് കേന്ദ്ര സംഘം ഇക്കാര്യത്തില് ആശങ്ക രേഖപ്പെടുത്തിയത്.
കോവിഡ് വ്യാപനം രൂക്ഷമായ സാഹചര്യത്തില് പരിശോധനകള് വര്ധിപ്പിച്ചില്ലെങ്കിലും തിരിച്ചടിയുണ്ടാകും. സംസ്ഥാനത്ത് ഇനിയും രോഗവ്യാപനം രൂക്ഷമാകാന് സാധ്യത നിലനില്ക്കുകയാണ്. ദേശീയ ശരാശരിയേക്കാള് സംസ്ഥാനത്ത് രോഗികളുടെ എണ്ണം എങ്ങനെ വര്ധിക്കുന്നുവെന്നും കേന്ദ്ര സംഘം ആരോഗ്യമന്ത്രിയോട് ചോദിച്ചു. രോഗവ്യാപനം രൂക്ഷമായിത്തുടങ്ങിയപ്പോള് തന്നെ ടെസ്റ്റുകള് വര്ധിപ്പിച്ചിരുന്നെങ്കില് ഇപ്പോള് സ്ഥിതി നിയന്ത്രണ വിധേയമാകുമായിരുന്നു. ഇക്കാര്യത്തില് ഇനിയെങ്കിലും നടപടിയുണ്ടാകണമെന്ന് കേന്ദ്ര സംഘം സംസ്ഥാനത്തോട് നിര്ദ്ദേശിച്ചു.
അതേസമയം ടെസ്റ്റ് വര്ധിപ്പിച്ചിട്ടുണ്ടെന്നും നടപടികള് സ്വീകരിക്കുന്നുണ്ടെന്നും മന്ത്രി മറുപടി നല്കി. സംസ്ഥാനത്ത് രോഗവ്യാപനം ഏറ്റവും ഉയര്ന്ന് നില്ക്കുന്ന സമയമാണിത്. മറ്റ് സംസ്ഥാനങ്ങളില് രോഗവ്യാപനം ഉണ്ടായി കുറഞ്ഞ ശേഷമാണ് ഇവിടെ കൂടുതല് പേര്ക്ക് സ്ഥിരീകരിച്ചത്. അതാണ് നിലവില് ടെസ്റ്റ് പോസിറ്റിവിറ്റി നിരക്ക് കേരളത്തില് കൂടുന്നതെന്നും മന്ത്രി മറുപടി നല്കി. മൂന്ന് ജില്ലകളില് സന്ദര്ശനം നടത്തിയ ശേഷമാണ് കേന്ദ്ര സംഘം ആരോഗ്യമന്ത്രിയുമായി കൂടിക്കാഴ്ച നടത്തിയത്. കേന്ദ്ര സംഘത്തിന്റെ റിപ്പോര്ട്ട് അടുത്ത ദിവസം തന്നെ കേന്ദ്ര ആരോഗ്യമന്ത്രാലയത്തിന് കൈമാറും.