ശ്രീജ.എസ്
മലപ്പുറം : മാറഞ്ചേരി സര്ക്കാര് ഹയര് സെക്കന്ഡറി സ്കൂളിലും പെരുമ്പടപ്പ് വന്നേരി ഹയര് സെക്കന്ഡറി സ്കൂളിലും നടത്തിയ കോവിഡ് പരിശോധനയില് 186 വിദ്യാര്ഥികള്ക്കും 74 അധ്യാപകര്ക്കും കോവിഡ് സ്ഥിരീകരിച്ചു. ഇതോടെ സ്കൂളുകള് അടിയന്തരമായി അടച്ചുപൂട്ടിയതായി റിപ്പോര്ട്ട്. പത്ത്, പന്ത്രണ്ട് ക്ലാസുകളിലെ വിദ്യാര്ഥികള്ക്ക് സ്കൂളില് പഠനം ആരംഭിച്ചിരുന്നു.
ഞായറാഴ്ച വൈകീട്ടോടെയാണ് പരിശോധനാഫലം പുറത്തുവന്നത്. മാറഞ്ചേരി സമൂഹാരോഗ്യ കേന്ദ്രത്തിലെ ജീവനക്കാരുടെ സഹകരണത്തോടെ വെള്ളിയാഴ്ചയാണ് പത്താം ക്ലാസ് വിദ്യാര്ഥികളും അധ്യാപകരും ഉള്പ്പെടെയുള്ളവരെുടെ സാമ്പിള് ആര്.ടി. പി.സി.ആര് പരിശോധനയ്ക്കായി എടുത്തത്.
ഇതില് മാറഞ്ചേരി സ്കൂളില് 150 വിദ്യാര്ഥികള്ക്കും 34 അധ്യാപകര്ക്കും വന്നേരി സ്കൂളിള് 40 അധ്യാപകര്ക്കും 36 വിദ്യാര്ഥികള്ക്കും കോവിഡ് സ്ഥിരീകരിച്ചു.
കോവിഡ് സ്ഥിരീകരിച്ചവരില് മാറഞ്ചേരി, വെളിയങ്കോട്, പെരുമ്പടപ്പ് പഞ്ചായത്തുകളിലും തൃശ്ശൂര് ജില്ലയിലെ വടക്കേകാട് മേഖലയിലും ഉള്പ്പെടുന്ന പ്രദേശങ്ങളിലെ വിദ്യാര്ഥികള് ഉള്പ്പെട്ടിട്ടുണ്ട്.