രാജ്യത്ത് ഒമിക്രോണ് ബാധിതരുടെ എണ്ണം 961 ആയി. 320 പേര് രോഗമുക്തരായി. 13,154 പേര്ക്ക് പുതുതായി കോവിഡ് സ്ഥിരീകരിച്ചു. പ്രതിദിനം 8,000 ത്തോളം കേസുകള് റിപ്പോര്ട്ട് ചെയ്തിരുന്നിടത്താണിത്. ഡിസംബര് 26 മുതല് പതിനായിരത്തിനു മുകളിലേക്ക് വന്നതായി വ്യാഴാഴ്ച നടത്തിയ വാര്ത്തസമ്മേളനത്തില് കേന്ദ്ര ആരോഗ്യ മന്ത്രാലയം ജോ.സെക്രട്ടറി ലവ് അഗര്വാള് പറഞ്ഞു. ഡെല്റ്റ വകഭേദത്തേക്കാള് ഒമിക്രോണിന് വ്യാപനശേഷി കൂടുതലാണെന്നും ലോകത്ത് ഇതുവരെ 58 ഒമിക്രോണ് മരണങ്ങള് റിപ്പോര്ട്ട് ചെയ്തെന്നും ലവ് അഗര്വാള് വ്യക്തമാക്കി.
കോവിഡ്, ഒമിക്രോണ് ബാധിതരുടെ എണ്ണം ഉയരുന്ന സാഹചര്യത്തില് പരിശോധനയും ആശുപത്രിതലത്തിലുള്ള സൗകര്യവും വര്ധിപ്പിക്കണമെന്ന് ആവശ്യപ്പെട്ട് ഡല്ഹി, മഹാരാഷ്ട്ര, ഹരിയാന, തമിഴ്നാട്, പശ്ചിമ ബംഗാള്, ഗുജറാത്ത്, കര്ണാടക, ജാര്ഖണ്ഡ് സംസ്ഥാനങ്ങള്ക്ക് കേന്ദ്രം കത്തയച്ചു.