മുംബൈ: ‘ടിക് ടോക്’ താരം പൂജ ചവാന്റെ (22) ആത്മഹത്യയുമായി ബന്ധപ്പെട്ട ആരോപണത്തെ തുടര്ന്ന് മഹാരാഷ്ട്ര വനംമന്ത്രി സഞ്ജയ് റാത്തോഡ് രാജികത്ത് നല്കി. ചൊവ്വാഴ്ച രാവിലെ ബാന്ദ്രയിലെ താക്കറെ വസതിയായ ‘മാതൊശ്രീ’യിലെത്തിയാണ് മുഖ്യമന്ത്രി ഉദ്ധവ് താക്കറെക്ക് രാജികത്ത് നല്കിയത്. വിദര്ഭയില് നിന്നുള്ള ശിവസേന നേതാവാണ് സഞ്ജയ് റാത്തോഡ്. രാജി മുഖ്യമന്ത്രി സ്വീകരിച്ചിട്ടില്ല.
പൂജ ചവാന്റെ ബന്ധുവും തന്റെ അനുയായിയുമായ സഞ്ജയ് ചവാന് നടത്തിയതായി ആരോപിക്കുന്ന ഫോണ്സംഭാഷണങ്ങളുടെ 11 ഓഡിയോ ക്ളിപ്പുകള് സമൂഹ മാധ്യമങ്ങളില് പ്രചരിച്ചിരുന്നു. ഇതോടെ, മന്ത്രിയുടെ രാജിയും പുജെയുടെ മരണത്തില് അന്വേഷണവുമാവശ്യപ്പെട്ട് പ്രതിപക്ഷ നേതാവ് ദേവേന്ദ്ര ഫഡ്നാവിസ് അടക്കം ബി.ജെ.പി നേതാക്കള് രംഗത്തെത്തി.
മന്ത്രിയില് നിന്ന് മുഖ്യമന്ത്രി നേരിട്ട് വിശദീകരണം കേട്ടിരുന്നു. തുടര്ന്ന് സംഭവം അന്വേഷിക്കാന് മുഖ്യമന്ത്രി ഉത്തരവിടുകയും ചെയ്തിരുന്നു. പുണെ പൊലിസ് കമിഷണര് അമിതാഭ് ഗുപ്ത കേസുമായി ബന്ധപ്പെട്ട പ്രാഥമിക വിവരങ്ങള് തങ്കളാഴ്ച മുഖ്യമന്ത്രിയെ അറിയിക്കുകയും ചെയ്തു.
മന്ത്രിക്കെതിരായ ആരോപണങ്ങള് പൂജയുടെ ബന്ധുക്കള് നിഷേധിച്ചിട്ടുണ്ട്. കഴിഞ്ഞ ഏഴിനാണ് പൂണെയില് സഹോദരന് താമസിക്കുന്ന കെട്ടിടത്തില് നിന്ന് പൂജ വീണു മരിച്ചത്. ബീഡ് സ്വദേശിയായ പൂജ സ്പോക്കണ് ഇംഗ്ളീഷ് പഠിക്കാനാണ് പുണെയില് എത്തിയത്.