ശ്രീജ.എസ്
ന്യൂഡല്ഹി: കോവിഡ് കേസുകള് വീണ്ടും വ്യാപിക്കുന്ന സാഹചര്യത്തില് കര്ശന നടപടികളിലേക്ക് കടന്ന് മഹാരാഷ്ട്ര. കേസുകള് ഇതേനിലയില് വ്യാപിക്കുന്നെങ്കില് രാത്രി കര്ഫ്യൂ ഏര്പ്പെടുത്തുമെന്ന് മുഖ്യമന്ത്രി ഉദ്ധവ് താക്കറെ അറിയിച്ചു.ഇതിന് പിന്നാലെ പുണെയില് കര്ഫ്യൂ പ്രഖ്യാപിച്ചു. രാത്രി 11 മുതല് പുലര്ച്ച ആറു വരെ അവശ്യസര്വീസുകളൊഴികെ മറ്റുള്ളവയ്ക്ക് വിലക്കേര്പ്പെടുത്തി. ഫെബ്രുവരി 28-വരെ സ്കൂളുകളും കോളേജുകളും അടച്ചിടാനും തീരുമാനിച്ചു.
രാജ്യത്ത് കേസുകള് ഉയരുന്ന കേരളമടക്കമുള്ള അഞ്ച് സംസ്ഥാനങ്ങള്ക്ക് കേന്ദ്ര ആരോഗ്യ മന്ത്രാലയം ജാഗ്രതാ നിര്ദേശം നല്കി. പരിശോധനാ നിരക്ക് വര്ധിപ്പിക്കാനും ആര്ടി-പിസിആര് ടെസ്റ്റുകള് ഉയര്ത്താനും കേന്ദ്രം അഞ്ച് സംസ്ഥാനങ്ങളോട് നിര്ദേശിച്ചു. രാജ്യത്ത് നിലവിലുള്ള സജീവ കേസുകളില് 74 ശതമാനവും കേരളത്തിലും മഹാരാഷ്ട്രയിലുമാണ്. കേരളവും മഹാരാഷ്ട്രയും കൂടാതെ പഞ്ചാബ്, ഛത്തീസ്ഗഢ്, മധ്യപ്രദേശ് എന്നീ സംസ്ഥാനങ്ങളിലും കഴിഞ്ഞ കുറച്ച് ദിവസങ്ങളിലായി കോവിഡ് കേസുകള് വര്ധിക്കുന്നുണ്ട്.