ന്യൂഡല്ഹി: ഇന്ത്യയിലെ അതിസമ്ബന്നരുടെ ഫോര്ബ്സ് പട്ടികയില് ഒന്നാമന് റിലയന്സ് ഇന്ഡസ്ട്രീസ് ചെയര്മാന് മുകേഷ് അംബാനി തന്നെ– 8450 കോടി ഡോളറാണ് ആസ്തി (6.24 ലക്ഷം കോടി രൂപ). അദാനി ഗ്രൂപ് ചെയര്മാന് ഗൗതം അദാനി രണ്ടാമതും എച്ച്.സി.എല് സ്ഥാപകന് ശിവ നാടാര് മൂന്നാമതുമാണ്.
രാജ്യത്ത് കോവിഡില് കുടുങ്ങി സാമ്ബത്തിക രംഗം തകര്ന്ന കഴിഞ്ഞ സാമ്ബത്തിക വര്ഷം ശതകോടീശ്വരന്മാരായ അതിസമ്ബന്നരുടെ പട്ടിക അതിവേഗമാണ് വളര്ന്നത്. മുന്വര്ഷം 102 പേരായിരുന്നത് പുതിയ പട്ടികയില് 140 ആയി വര്ധിച്ചു– ഇവരുെട മൊത്തം ആസ്തി 59,600 കോടി ഡോളറാണ്.
ഇന്ത്യയിലെ അതിസമ്ബന്നനായ മുകേഷ് അംബാനി ഏഷ്യയിലെയും ഒന്നാമനാണ്. എണ്ണ, ഗ്യാസ് സാമ്രാജ്യങ്ങള്ക്ക് പുറമെ ടെലികോം, ചില്ലറ വ്യാപാരം തുടങ്ങി ബഹുവിധ മേഖലകളില് മുന്നിരയിലാണ് അംബാനി. രണ്ടാമതുള്ള അദാനിയാകട്ടെ, ഒറ്റ വര്ഷം കൊണ്ട് അധികമായി ആസ്തി വര്ധനയുണ്ടാക്കിയത് 4200 കോടി ഡോളറും. 2020 മുതല് അദാനിയുടെ ആസ്തി വര്ധന അഞ്ചിരട്ടിയാണെന്ന് ഫോര്ബ്സ് പറയുന്നു. അദാനി എന്റര്പ്രൈസസ്, അദാനി ഗ്രീന് എനര്ജി എന്നിവയുടെ ഓഹരി മൂല്യം കുത്തനെ ഉയര്ന്നതാണ് ഗുജറാത്ത് വ്യവസായിക്ക് അതിവേഗ വളര്ച്ച ഉറപ്പാക്കിയത്.
ആതുര സേവന രംഗത്ത് നിക്ഷേപമിറക്കിയ രണ്ടു വമ്ബന്മാര് അതിസമ്പന്നരുടെ ആദ്യ 10ല് ഇടംപിടിച്ചെന്ന സവിശേഷതയുമുണ്ട്. കോവിഡിനുള്പെടെ വാക്സിനുകള് നിര്മിക്കുന്ന ലോകത്തെ ഏറ്റവും വലിയ കമ്ബനിയായ സീറം ഇന്സ്റ്റിറ്റ്യൂട്ട് ഓഫ് ഇന്ത്യയുടെ സൈറസ് പൂനാവാല, സണ് ഫാര്മസ്യൂട്ടിക്കല്സ് ഇന്ഡസ്ട്രീസിന്റെ ദിലീപ് ഷാങ്വി എന്നിവരാണ് പട്ടികയിലെത്തിയത്. കോവിഷീല്ഡാണ് സീറം ഇന്സ്റ്റിറ്റ്യൂട്ട് നിര്മിക്കുന്ന കോവിഡ് വാക്സിന്. കഴിഞ്ഞ വര്ഷം പട്ടികയില് 12ാം സ്ഥാനത്തായിരുന്ന ദിലീപ് ഷാങ്വി ഒരു വര്ഷത്തിനിടെ 9ാം സ്ഥാനത്തേക്കുയര്ന്നു.
രാധാകൃഷ്ണന് ദമാനി ഉദയ് കോടക്, ലക്ഷ്മണ് മിത്തല്, കുമാര് ബിര്ല, സുനില് മിത്തലും കുടുംബവും എന്നിവരാണ് അവശേഷിച്ചവര്.