ന്യൂഡല്ഹി: രാജ്യത്ത് ലോക്ഡൗണ് പ്രഖ്യാപിക്കുന്നതിനും 41 ദിവസം മുമ്പേ ഫെബ്രുവരിയില് കോവിഡ് വൈറസ് രാജ്യത്തിനും സമ്പദ്വ്യവസ്ഥക്കും കനത്ത വെല്ലുവിളിയാണെന്നും കേന്ദ്ര സര്ക്കാര് ഇതിനെ ഗൗരവത്തില് എടുക്കുന്നില്ലെന്നും രാഹുല് ഗാന്ധി ട്വീറ്റ് ചെയ്തിരുന്നു. ഈ സംഭവം ബംഗാള് നിയമസഭ തെരഞ്ഞെടുപ്പ് പ്രചാരണത്തിനിടെ ഡാര്ജിലിങ്ങില് നടത്തിയ പ്രസംഗത്തില് രാഹുല് ഗാന്ധി വീണ്ടും ഓര്മിപ്പിച്ചു.
‘രാജ്യത്ത് ഒരു കൊടുങ്കാറ്റ് ആഞ്ഞടിക്കാന് പോകുകയാണെന്ന് അന്നേ ഞങ്ങള് മുന്നറിയിപ്പ് നല്കിയിരുന്നു. രാജ്യത്തെ മൊത്തം തകര്ക്കാന് പോന്ന ഒന്നാകും അതെന്നായിരുന്നു അന്ന് പറഞ്ഞത്. രാഹുല് വെറുതെ ആളുകളെ പരിഭ്രാന്തരാക്കാന് വേണ്ടി പറയുകയാണെന്നായിരുന്നു മാധ്യമങ്ങളടക്കം അന്ന് പറഞ്ഞത്‘. രാഹുല് ഗാന്ധി വ്യക്തമാക്കി.
ഇന്ത്യയെ കോവിഡ് മഹാമാരി അതിരൂക്ഷമായി ബാധിക്കുമെന്നും രാജ്യത്തെയും അതിന്റെ സമ്പദ്വ്യവസ്ഥയെയും രക്ഷിക്കാനും, ചെറുകിട വ്യവസായികളെയും വ്യാപാരികളെയും സംരക്ഷിക്കാനും വേണ്ട മാര്ഗങ്ങള് കൈകൊള്ളാന് ഞങ്ങള് പ്രധാനമന്ത്രിയോട് ആവശ്യപ്പെട്ടിരുന്നുവെന്നും രാഹുല് ഗാന്ധി പറയുന്നു.
രാജ്യം ദുരന്തത്തെ നേരിടുമ്പോള് വേണ്ട നടപടികള് കൈകൊള്ളാതെ തകര്ന്ന് കൊണ്ടിരിക്കുന്ന സമ്പവ്യവസ്ഥയെ താങ്ങിനിര്ത്താന് ശ്രമിക്കാതെമോദി സര്ക്കാര് പൗരന്മാരെ കൊണ്ട് മണി കൊട്ടിക്കുകയായിരുന്നുവെന്നും രാഹുല് കുറ്റപ്പെടുത്തി.