ലിവര്‍പൂളിനും യുണൈറ്റഡിനും ജയം

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മുന്‍നിരടീമുകള്‍ക്ക് ജയം. യൂറോപ്പാ ലീഗ് സെമിഫൈനല്‍ മത്സരങ്ങള്‍ അവസാനിച്ചതിന് ശേഷമുള്ള പോരാട്ടങ്ങളില്‍ നിലവിലെ ചാമ്പ്യന്മാരായ ലിവര്‍പൂളും മാഞ്ചസ്റ്റര്‍ യുണൈഡും മികച്ച ജയം നേടി. കഴിഞ്ഞയാഴ്ച വിയ്യാറലിനോട് യൂറോപാ ലീഗില്‍ അടിയറ പറഞ്ഞ ആഴ്സണല്‍ തകര്‍പ്പന്‍ ജയമാണ് ഇംഗ്ലീഷ് ലീഗില്‍ നേടിയത്. ലിവര്‍പൂള്‍ 2-0ന് സതാപ്ടണിനേയും യുണൈറ്റഡ് 3-1ന് ആസ്റ്റണ്‍ വില്ലയേയും, ആഴ്സണല്‍ 3-1ന് വെസ്റ്റ് ബ്രോമിനേയും പരാജയപ്പെടുത്തി. മറ്റ് മത്സരങ്ങളില്‍ വൂള്‍വ്സ് ബ്രൈറ്റണിനേയും എവര്‍ട്ടണ്‍ വെസ്റ്റ് ഹാമിനേയും തോല്‍പ്പിച്ചു.

എതിരില്ലാത്ത രണ്ടു ഗോളുകള്‍ക്കാണ് ലിവര്‍പൂള്‍ സതാംപ്ടണിന് മേല്‍ ജയം നേടിയത്. 31-ാം മിനിറ്റില്‍ സദിയോ മാനേയും 90-ാം മിനിറ്റില്‍ തിയാഗോ അല്‍കാന്ദ്രയുമാണ് ലിവര്‍പൂളിനായി ഗോളടിച്ചത്. ഒന്നിനെതിരെ മൂന്ന് ഗോളിനായിരുന്നു യുണൈററഡിന്‍റെ ജയം. 24-ാം മിനിറ്റില്‍ ബെര്‍ട്രന്‍റ് ട്രാഓരേ ആസ്റ്റണ്‍ വില്ലയ്ക്കായി യുണൈറ്റഡിന്‍റെ വല ചലിപ്പിച്ചു. എന്നാല്‍ രണ്ടാം പകുതിയില്‍ നിറഞ്ഞാടിയ യുണൈറ്റഡ് 52-ാം മിനിറ്റില്‍ ബ്രൂണോ ഫെര്‍ണാണ്ടസിലൂടെ സമനില ഗോള്‍ നേടി. മൂ്ന്നു മിനിറ്റിനകം മാസണ്‍ ഗ്രീന്‍വുഡ് വിജയഗോളും 87-ാം മിനിറ്റില്‍ എഡിസണ്‍ കവാനി മൂന്നാം ഗോളും സ്വന്തമാക്കി.

യൂറോപ്പാ ലീഗിലെ സെമിയില്‍ വിയ്യറയിലിനോട് തോറ്റ ക്ഷീണം ആഴ്സണല്‍ വെസ്റ്റ് ബ്രോമിനോട് തീര്‍ത്തു. ഒന്നിനെതിരെ മൂന്ന് ഗോളുകള്‍ക്കായിരുന്നു ഗണ്ണേഴ്സിന്‍റെ ജയം. എമിലേ സ്മിത്ത് 29-ാം മിനിറ്റില്‍ ആഴ്സണലിന് ലീഡ് നല്‍കി.35-ാം മിനിറ്റില്‍ നിക്കോളാസ് പെപെ രണ്ടാം ഗോളും നേടി. 67-ാം മിനിറ്റില്‍ മാത്തേവൂസ് പെരേര വെസ്റ്റ് ബ്രോമിന്‍റെ ആശ്വാസ ഗോള്‍ നേടിയെങ്കിലും 90-ാം മിനിറ്റില്‍ ലീഡുയര്‍ത്തി വില്ലിയന്‍ ആഴ്സണലിന്‍റെ ജയം ആധികാരികമാക്കി.