ന്യൂഡല്ഹി: യു.എസ് കോവിഡ് വാക്സിനുകളായ ഫൈസറും മോഡേണയും ഇന്ത്യയില് ഉടന് എത്തില്ലെന്ന് റിപ്പോര്ട്ട് .2021ന്റെ മൂന്നാം പാദത്തില് മാത്രമേ ഈ വാക്സിനുകള് ഇന്ത്യയില് എത്താന് സാധ്യതയുള്ളുവെന്ന് നീതി ആയോഗ് അംഗം വി.കെ പോള് വെളിപ്പെടുത്തി .ഇതുമായി ബന്ധപ്പെട്ട് വിദേശ വാക്സിന് നിര്മാതാക്കളുമായി സര്ക്കാര് ചര്ച്ചകള് തുടരുന്നുണ്ടെന്നും അദ്ദേഹം പറഞ്ഞു .
കോവിഡ് വാക്സിന് നേരിട്ട് ഇന്ത്യയിലേക്ക് ഇറക്കുമതി ചെയ്യുകയോ അല്ലെങ്കില് ഇന്ത്യന് കമ്പനികളുടെ സഹായത്തോടെ രാജ്യത്ത് നിര്മിക്കുകയോ ചെയ്യാമെന്ന് കമ്പനികളെ അറിയിച്ചിട്ടുണ്ട്. ഫൈസറും മോഡേണയും സ്വന്തം നിലക്ക് വാക്സിന് ഇറക്കുമതി നടത്താമെന്നാണ് അറിയിച്ചിട്ടുള്ളതെന്നും വി.കെ പോള് അറിയിച്ചു .അതേസമയം, ജോണ്സണ് & ജോണ്സണ് ഇന്ത്യന് കമ്ബനിയുമായി ചേര്ന്ന് വാക്സിന് നിര്മാണം നടത്താന് സന്നദ്ധത അറിയിച്ചുവെന്ന വാര്ത്തകള് പ്രചരിക്കുന്നുണ്ട് .സെറം ഇന്സ്റ്റിറ്റ്യൂട്ടുമായി ചേര്ന്ന് വാക്സിന് നിര്മാണം നടത്താനുള്ള സാധ്യതകളാണ് ജോണ്സണ് & ജോണ്സണ് പരിശോധിക്കുന്നത്.