പുഞ്ച് (ജമ്മ & കാശ്മീര്) : ഏറ്റുമുട്ടല്ജമ്മു കശ്മീരിലെ പൂഞ്ചില് ഭീകരരും സുരക്ഷാ സൈനികരും തമ്മില് ഏറ്റുമുട്ടല്. പൂഞ്ചിലെ സുരാന്കോട്ട് വനമേഖലയിലാണ് ഏറ്റുമുട്ടല്. ഒരു ഭീകരനെ സൈന്യം വധിച്ചതായി റിപ്പോര്ട്ടുണ്ട്. സൈനിക നടപടി തുടരുകയാണ്. മൂന്ന് ഭീകരര് ഒളിച്ചിരിക്കുന്നുവെന്ന വിവരത്തെ തുടര്ന്നാണ് പൂഞ്ചിലെ സൂരന്കോട്ടില് സുരക്ഷാ സൈന്യം തിരച്ചില് നടത്തിയത്. തിരച്ചിലിനിടെ ഭീകരര് സൈന്യത്തിന് നേരെ വെടിയുതിര്ക്കുകയായിരുന്നു. കൂടുതല് വിവരങ്ങള് പുറത്തുവിട്ടിട്ടില്ല.
അതിനിടെ, ശ്രീനഗറിലെ ഭീകരാക്രമണത്തില് പരിക്കേറ്റ ഒരു പൊലീസുകാരന് കൂടി മരിച്ചു. രണ്ട് പൊലീസുകാരുടെ നില ഗുരുതരമായി തുടരുകയാണ്. ആക്രമണത്തില് രണ്ട് പൊലീസുകാര് ഇന്നലെ കൊല്ലപ്പെട്ടിരുന്നു.
ഇന്നലെ വൈകുന്നേരം ആറ് മണിയോടെ ശ്രീനഗര് സിവാനിലെ പൊലീസ് ക്യാമ്ബിന് സമീപമാണ് ആക്രമണം നടന്നത്. പൊലീസുകാര് സഞ്ചരിച്ച ബസിന് നേരെ ഭീകരര് വെടിവെക്കുകയായിരുന്നു. പരിശീലനത്തിന് ശേഷം ക്യാമ്പിലേക്ക് മടങ്ങുന്നതിനിടെയായിരുന്നു ആക്രമണം.
ശ്രീനഗര് ഭീകരാക്രമണത്തിന് പിന്നില് ജയ്ഷെ മുഹമ്മദ് ആണെന്ന് ജമ്മു കശ്മീര് പൊലീസ് അറിയിച്ചു. ജയ്ഷെ മുഹമ്മദിന്റെ ഭാഗമായ കശ്മീര് ടൈഗേഴ്സാണ് ആക്രമണം നടത്തിയതെന്നും പൊലീസ് വ്യക്തമാക്കി.