![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: ഇന്ത്യയില്‍ കൊവിഡ് രോഗികള്‍ക്കിടയില്‍ ബ്ലാക്ക് ഫംഗസ് ബാധ കൂടി വരികയാണ്. ഈ സാഹചര്യത്തില്‍ കൊവിഡ് ഇല്ലാത്ത ആളുകള്‍ക്ക് ബ്ലാക്ക് ഫംഗസ് ബാധ വരുമോ എന്ന സംശയവും ആശങ്കയും ഉയരുകയാണ്.ഇതിന് മറുപടിയുമായി രംഗത്തെത്തിയിരിക്കുകയാണ് വിദഗ്ധര്‍.കൊവിഡ് ബാധിതരല്ലാത്തവര്‍ക്കും ബ്ലാക്ക് ഫംഗസ് ബാധിക്കുമെന്നാണ് വിദഗ്ധര്‍ പറയുന്നത്. രക്തത്തില്‍ ഉയര്‍ന്ന പഞ്ചസാരയുടെ അളവുള്ള വ്യക്തികള്‍ ജാഗ്രത പാലിക്കണമെന്നാണ് മുന്നറിയിപ്പ്.
‘കൊവിഡിനും മുമ്പുണ്ടായിരുന്ന അണുബാധയാണിത്. ബ്ലാക്ക് ഫംഗസ് പ്രമേഹ രോഗികളെ ബാധിക്കുന്നു എന്നാണ് മെഡിക്കല്‍ വിദ്യാര്‍ഥികളെ പഠിപ്പിക്കുന്നത്. അനിയന്ത്രിതമായ പ്രമേഹമുള്ളരാണ് ജാഗ്രത പാലിക്കേണ്ടത്. അനിയന്ത്രിതമായ പ്രമേഹവും മറ്റ് ചില പ്രധാന രോഗങ്ങളും കൂടിച്ചേര്‍ന്ന് ബ്ലാക്ക് ഫംഗസ് ബാധയിലേക്ക് നയിക്കാം’ -നിതി ആയോഗ് അംഗം ഡോ. വി.കെ. പോള്‍ പറഞ്ഞു.
ബ്ലാക്ക് ഫംഗസ് ബാധിക്കുന്ന ഒരാളുടെ രക്തത്തിലെ പഞ്ചസാരയുടെ അളവ് 700-800 വരെ എത്തുന്നുവെന്ന് ഡോ. പോള്‍ പറഞ്ഞു. ഇത് വൈദ്യശാസ്ത്രപരമായി ഡയബറ്റിക് കെറ്റോഅസിഡോസിസ് എന്നാണ് അറിയപ്പെടുന്നത്. ബ്ലാക്ക് ഫംഗസ് കുട്ടികളിലും പ്രായമായവരിലും കാണപ്പെടുന്നത് സാധാരണമാണെന്ന് അദ്ദേഹം പറഞ്ഞു.
രോഗപ്രതിരോധശേഷി കുറഞ്ഞ ആളുകള്‍ മാത്രം ബ്ലാക്ക് ഫംഗസിനെ പേടിച്ചാല്‍ മതിയെന്നും ആരോഗ്യമുള്ള വ്യക്തികള്‍ ഭയക്കേണ്ടതില്ലെന്നും ഡല്‍ഹി എയിംസിലെ ഡോ. നിഖില്‍ ടണ്ഡന്‍ പറഞ്ഞു. ‘മഹാമാരിയുടെ രണ്ടാം തരംഗത്തില്‍ കൊവിഡ് വകഭേദം ആദ്യ തരംഗത്തെ അപേക്ഷിച്ച്‌ പ്രതിരോധശേഷിയെ കൂടുതലായി ആക്രമിച്ചിരിക്കാം. അതിനാലാണ് ബ്ലാക്ക് ഫംഗസ് കേസുകള്‍ റിപ്പോര്‍ട്ട് ചെയ്യപ്പെടുന്നത്. ഇതിനുപുറമെ, ഈ തരംഗത്തില്‍ സ്റ്റിറോയിഡുകളുടെ വ്യാപകമായ ഉപയോഗവും ഉണ്ടായിട്ടുണ്ട്. എന്നാല്‍ ശരിയായ അന്വേഷണം കൂടാതെ ഒന്നും കൃത്യമായി പറയാന്‍ കഴിയില്ല’-ഡോ. ടണ്ഡന്‍ പറഞ്ഞു. ഞായറാഴ്ച ഹരിയാനയിലെ ബ്ലാക്ക് ഫംഗസ് കേസുകളുടെ എണ്ണം 398 ആയി ഉയര്‍ന്നിരുന്നു. കേരളത്തില്‍ നാല് ബ്ലാക്ക് ഫംഗസ് മരണങ്ങളും റിപ്പോര്‍ട്ട് ചെയ്തു . ഉത്തരാഖണ്ഡ് രോഗത്തെ സാംക്രമികരോഗമായി പ്രഖ്യാപിച്ചിട്ടുണ്ട്.
