ന്യൂഡല്ഹി: രാജ്യത്ത് കുട്ടികളിലെ വാക്സിന് പരീക്ഷണത്തിന്റെ ഭാഗമായി ഏഴ് പേര്ക്ക് കൂടി കോവാക്സിന് ആദ്യ ഡോസ് കുത്തിവെച്ചു. പട്ന എയിംസിലാണ് കുട്ടികള്ക്ക് വാക്സിന്റെ ആദ്യ ഡോസ് നല്കിയത്. ജൂണ് 3 നാണ് ഇവിടെ കോവാക്സിന് പരീക്ഷണം തുടങ്ങിയത്. ആദ്യ ദിവസം മൂന്ന് പേര്ക്കാണ് വാക്സിന് നല്കിയത്. രണ്ട് മുതല് 18 വയസ് വരെ പ്രായമുള്ള കുട്ടികളിലെ വാക്സിന് പരീക്ഷണമാണ് പുരോഗമിക്കുന്നത്.
കുട്ടികളുടെ ആരോഗ്യപരിശോധനക്ക് ശേഷമാണ് വാക്സിന് നല്കുന്നത്. ഇത്തരത്തില് 21 കുട്ടികളെ ആരോഗ്യ പരിശോധനക്ക് വിധേയമാക്കിയിരുന്നു. ഇതില് 12 പേരില് ആന്റിബോഡിയുടെ സാന്നിധ്യം കണ്ടെത്തി. അവശേഷിക്കുന്ന ഒന്പത് പേരില് ഏഴ് പേര്ക്കാണ് കോവാക്സിന്റെ ആദ്യ ഡോസ് നല്കിയത്.
പട്ന എയിംസില് ഇതുവരെ 10 കുട്ടികള്ക്ക് കോവാക്സിന് ആദ്യ ഡോസ് നല്കിയിട്ടുണ്ട്. 28 ദിവസങ്ങള്ക്ക് ശേഷം ഇവര്ക്ക് രണ്ടാം ഡോസും നല്കും. 100 കുട്ടികളെയെങ്കിലും വാക്സിനേഷന് വിധേയമാക്കുക എന്നതാണ് ലക്ഷ്യമെന്ന് പട്ന എയിംസ് അധികൃതര് അറിയിച്ചു.