‘ലാംഡ ‘ വകഭേദം 29 രാജ്യങ്ങളില് റിപ്പോര്ട്ട് ചെയ്തെന്ന് ലോകാരോഗ്യ സംഘടന
ജെനീവ : ലോകത്ത് കൊറോണയുടെ പുതിയ വകഭേദം വ്യാപിക്കുന്നതായി ലോകാരോഗ്യ സംഘടനയുടെ വെളിപ്പെടുത്തല്. കോവിഡിന്റെ ‘ലാംഡ ‘ വകഭേദം 29 രാജ്യങ്ങളില് റിപ്പോര്ട്ട് ചെയ്തതായാണ് വിവരം. തെക്കേ അമേരിക്കയിലാണ് ലാംഡ വകഭേദം ആദ്യം കണ്ടെത്തിയതെന്നും ഡബ്ള്യ എച്ച് ഒ വ്യക്തമാക്കി.
ആദ്യം ലാംഡ വകഭേദം കണ്ടെത്തിയത് പെറുവിലാണ്. ഉയര്ന്ന വ്യാപന സാധ്യതയുള്ളതിനാല് ജാഗ്രത പാലിക്കണമെന്നും ലോകാരോഗ്യ സംഘടന നിര്ദേശം നല്കി. 2021 ഏപ്രില് മുതല് പെറുവില് റിപ്പോര്ട്ട് ചെയ്ത 81 ശതമാനം കേസുകളും ഈ വകഭേദത്തിന്റെതാണെന്ന് അധികൃതര് ചൂണ്ടിക്കാട്ടുന്നു .
മനുഷ്യരില് രോഗവ്യാപന സാധ്യത കൂട്ടുന്നതിനും ആന്റിബോഡികളോടുള്ള വൈറസിന്റെ പ്രതിരോധത്തെ ശക്തിപ്പെടുത്തുന്നതിനായുള്ള പരിവര്ത്തനങ്ങള് ലാംഡ വകഭേദത്തിനുണ്ടെന്നും ലോകാരോഗ്യ സംഘടന വെളിപ്പെടുത്തുന്നു. ലാംഡ വകഭേദത്തെക്കുറിച്ച് കൂടുതല് പഠനം ആവശ്യമാണെന്നും സംഘടന കൂട്ടിച്ചേര്ത്തു.
അതെ സമയം നിലവില് ഗാമ, ഡെല്റ്റ വകഭദങ്ങള് ലോകരാജ്യങ്ങളിലേക്ക് വ്യാപിച്ചിരുന്നു. ഇന്ത്യയില് ആദ്യം കണ്ടെത്തിയ ഡെല്റ്റ വകഭേദം നിരവധി രാജ്യങ്ങളിലാണ് റിപ്പോള്ട്ട് ചെയ്തത്. വകഭേദങ്ങള് അതിവേഗം വ്യാപിക്കുന്നതിനാലാണ് ഇവയെ തരം തിരിച്ച് നിരീക്ഷിക്കാന് ലോകാരോഗ്യ സംഘടന മുന്നോട്ട് പോകുന്നത് .