മ്യൂണിക്കിൽ ഗോൾമഴ; ദാനഗോളിൽ പോർച്ചുഗലിനെ തകർത്ത് ജർമ്മനി

മ്യൂണിക്: യൂറോ കപ്പിലെ മരണ ഗ്രൂപ്പായ ഗ്രൂപ്പ് എഫിലെ സൂപ്പർ പോരാട്ടത്തിൽ ജർമ്മനിയ്ക്ക് ജയം. ക്രിസ്റ്റ്യാനോ റൊണാൾഡോയുടെ പോർച്ചുഗലിനെ രണ്ടിനെതിരെ നാല് ഗോളുകൾക്കാണ് ജർമ്മനി തകർത്തത്. പോർച്ചുഗീസ് ഡിഫൻഡർമാർ നൽകിയ രണ്ട് ദാന ഗോളാണ് ജർമ്മനിയ്ക്ക് ജയം സമ്മാനിച്ചത്.

സൂപ്പർ താരം ക്രിസ്റ്റ്യാനോ റൊണാൾഡോയുടെ ഗോളിൽ ആദ്യം മുന്നിലെത്തിയത് പോർച്ചുഗലാണെങ്കിലും, ശക്തമായ പ്രത്യാക്രമണത്തിലൂടെ ജർമ്മനി തിരിച്ചുവന്നു. പോർച്ചുഗീസ് പ്രതിരോധ താരങ്ങളായ റൂബൻ ഡയസിന്റെയും റഫേൽ ഗ്യുറെറോയുടെയും സെൽഫ് ഗോളുകളിൽ മുന്നിലെത്തിയ മുൻ ലോകചാമ്പ്യൻമാർ, ലീഡ് വർധിപ്പിച്ചത്
കായ് ഹാവട്‌സ്, റോബിൻ ഗോസൻസ് എന്നിവരുടെ ബൂട്ടിൽ നിന്നായിരുന്നു.

ക്രിസ്റ്റ്യാനോയുടെ അക്രോബാറ്റിക് അസിസ്റ്റിൽ ഡിയോഗോ ജോട്ട ഒരു ഗോൾ കൂടി മടക്കിയെങ്കിലും, കൂടുതൽ ഗോൾ വഴങ്ങാതെ പ്രതിരോധ കോട്ട കാക്കാൻ അന്റോണിയോ റൂഡിഗർ അടക്കമുള്ള ജർമ്മൻ ഡിഫെൻസ് പോരാളികൾക്കായി.

ജയത്തോടെ പ്രീക്വാർട്ടർ സാധ്യത ജർമ്മനി നിലനിർത്തി. രണ്ട് മത്സരങ്ങളില്‍ നിന്ന് മൂന്ന് പോയിന്റുള്ള ജര്‍മനി പട്ടികയിൽ രണ്ടാമതും ഇത്രയും തന്നെ പോയിന്റുള്ള പോര്‍ച്ചുഗല്‍ മൂന്നാം സ്ഥാനത്തുമാണ്. നാല് പോയിന്റുള്ള ഫ്രാന്‍സാണ് ഒന്നാം സ്ഥാനത്ത്.