വിവാഹം കഴിച്ചയച്ച പെണ്മക്കളുടെ വീട്ടിലേക്ക് മാതാപിതാക്കള് സമ്മാനങ്ങളുമായി പോകുന്നത് സാധാരണമാണ്. എന്നാല് അത്തരത്തില് വിവാഹിതയായ മകള്ക്ക് അച്ഛന് നല്കിയ സമ്മാനമാണ് ഇപ്പോള് സോഷ്യല് ലോകത്ത് വൈറലാകുന്നത്. 1000 കിലോ മീന്, 1000 കിലോ പച്ചക്കറി തുടങ്ങി നിത്യോപയോഗ സാധനങ്ങളുടെ കലവറയാണ് ബട്ടുല ബലരാമ കൃഷ്ണ എന്ന വ്യവസായി സമ്മാനമായി നല്കിയിരിക്കുന്നത്.
തെലുങ്ക് ആചാരപ്രകാരമുള്ള ആഷാഡ മാസത്തിലെ ചടങ്ങിനായാണ് ബട്ടുല ബാലരാമ മകള്ക്ക് സമ്മാനങ്ങള് നല്കിയത്. ആന്ധ്രപ്രദേശിലെ പ്രമുഖ ബിസിനസുകാരനാണ് ബാലരാമ. പുതുച്ചേരിയിലെ യാനത്തുള്ള ബിസിനസ്സുകാരന്റെ മകന് പവന് കുമാറിനാണ് ബാലരാമ മകള് പ്രത്യുഷയെ വിവാഹം ചെയ്തു നല്കിയത്.
മകളുടേയും മരുമകന്റേയും ആദ്യ ആഷാഡമാണിത്. ഈ അവസരത്തിലാണ് ഇത്തരത്തില് ആര്ഭാടമായ ഉപഹാരം പിതാവ് നല്കിയത്. മകളോടോ വീട്ടുകാരോടോ സമ്മാനത്തെ കുറിച്ച് ബാലരാമ പറഞ്ഞിരുന്നില്ല. ഭാര്യവീട്ടില് നിന്ന് വലിയ ലോറിയില് ഇത്രയധികം സാധനങ്ങള് അപ്രതീക്ഷിതമായി സമ്മാനമായി എത്തിയത് എല്ലാവരെയും ഞെട്ടിച്ചു.