മുംബൈ: ഒളിമ്പ്യന് എസ്.എസ്. നാരായണന് എന്ന ബാബു നാരായണന് (86) അന്തരിച്ചു. വ്യാഴാഴ്ച വൈകീട്ട് ആശുപത്രിയില് നിന്നും താനെയിലുള്ള വീട്ടിലേക്ക് എത്തിയ ഉടനെ ഹൃദയാഘാതത്തെ തുടര്ന്നായിരുന്നു അന്ത്യം. ഹെര്ണിയ ശസ്ത്രക്രിയയെ തുടര്ന്ന് കുറച്ചു ദിവസമായി ആശുപത്രിയിലായിരുന്നു.
1956 ലെ മെല്ബണ്, 1960 ലെ റോം ഒളിമ്ബിക്സുകളില് ഇന്ത്യന് ഫുട്ബാള് ടീം ഗോള്കീപ്പറായിരുന്നു. പീറ്റര് തങ്കരാജന്, പി.കെ. ബാനര്ജി, ചുനി ഗോസ്വാമി തുടങ്ങിയവര്ക്കൊപ്പമായിരുന്നു എസ്.എസ്. നാരായണന് ഇന്ത്യന് ടീമില് ഇടം നേടിയത്. 1954 ല് മഹാരാഷ്ട്ര ബാസ്ക്കറ്റ് ബാള് ടീം അംഗമായിരുന്ന നാരായണന് പിന്നീട് ഫുട്ബാളിലേക്ക് മാറുകയായിരുന്നു. ടാറ്റാസ് ഫുട്ബാള് ക്ലബ്, കാള്ടെക്സ് ടീമുകളില് കളിച്ച ശേഷമാണ് ഇന്ത്യന് ടീമിലെത്തുന്നത്.