മത്സരത്തിൽ നിന്ന് പിന്മാറിയ ഇംഗ്ലണ്ടിനെതിരെ മൈക്കല്‍ ഹോള്‍ഡിങ്

ലണ്ടന്‍ : പാകിസ്താന്‍ പര്യടനത്തില്‍ നിന്ന് പിന്മാറിയ ഇംഗ്ലണ്ട് ആന്‍ഡ് വെയ്ല്‍സ് ക്രിക്കറ്റ് ബോര്‍ഡിനെതിരേ വിമര്‍ശനവുമായി മുന്‍ വെസ്റ്റിന്‍ഡീസ് ക്രിക്കറ്റ് ഇതിഹാസം മൈക്കല്‍ ഹോള്‍ഡിങ്.

സമ്പന്നരും ശക്തരുമായ ഇന്ത്യയ്‌ക്കെതിരെയായിരുന്നെങ്കില്‍ ഇംഗ്ലണ്ട് ഇത്തരത്തില്‍ പെരുമാറുമായിരുന്നോ എന്നും ഹോള്‍ഡിങ് ചോദിച്ചു. ബിബിസി സ്‌പോര്‍ട്ടിനോടായിരുന്നു ഹോള്‍ഡിങ്ങിന്റെ പ്രതികരണം.

തങ്ങൾ ചെയ്തത് തെറ്റാണെന്ന് അവർക്കറിയാവുന്നതിനാൽ ആരും മുന്നോട്ട് വന്ന് ഒന്നും പറയാൻ ആഗ്രഹിക്കുന്നില്ല. അവർ ഒരു പ്രസ്താവന പുറപ്പെടുവിക്കുകയും ആ പ്രസ്താവനയ്‌ക്ക് പിന്നിൽ ഒളിക്കുകയും ചെയ്തു. ഞാൻ അതിലേക്ക് ഒന്നും പോകുന്നില്ല, കാരണം ഞാൻ അതിനെക്കുറിച്ച് ആവശ്യത്തിന് പറഞ്ഞിട്ടുണ്ട്. എന്നാൽ അത് കാട്ടുന്നത് പാശ്ചാത്യ അഹങ്കാരമാണ്. അവർ ഇന്ത്യയോട് അങ്ങനെ ചെയ്യില്ലെന്ന് എനിക്ക് ഉറപ്പുണ്ട്, കാരണം ഇന്ത്യ സമ്പന്നവും ശക്തവുമാണ്. നിങ്ങളോട് എങ്ങനെ പെരുമാറണമെന്ന് എനിക്ക് തോന്നുന്നുവോ, ഞാൻ അതേ രീതിയിൽ നിങ്ങളോട് പെരുമാറും, നിങ്ങൾ എന്ത് ചിന്തിച്ചാലും പ്രശ്നമില്ല, എനിക്ക് വേണ്ടത് ഞാൻ ചെയ്യും – മൈക്കല്‍ ഹോള്‍ഡിങ് പറഞ്ഞു .

ഏതാനും ആഴ്ചകള്‍ക്ക് മുമ്പാണ് അവസാന നിമിഷം ഇംഗ്ലണ്ട് ടീം പാകിസ്താനെതിരായ പരമ്പരയില്‍ നിന്ന് പിന്മാറിയത്. സുരക്ഷാ കാരണങ്ങള്‍ മുന്‍നിര്‍ത്തിയായിരുന്നു പിന്മാറ്റം. നേരത്തെ ന്യൂസീലന്‍ഡ് ടീമും ഇത്തരത്തില്‍ പാക് പര്യടനത്തില്‍ നിന്ന് പിന്മാറിയിരുന്നു.