ന്യൂഡല്ഹി: രാജ്യത്ത് രൂക്ഷമാകുന്ന അന്തരീക്ഷ മലിനീകരണം മണ്സൂണ് മഴ തടസപ്പെടുത്തുമെന്ന് പുതിയ പഠനം. വായു മലിനീകരണം 10 മുതല് 15 ശതമാനം വരെ മണ്സൂണ് മഴ കുറയ്ക്കുമെന്നാണ് പുതിയ പഠനം .ഇന്ത്യയിലെ മണ്സൂണിനെയും വായുമലിനീകരണം പ്രതികൂലമായി ബാധിക്കുമെന്ന വെളിപ്പെടുത്തല് തികച്ചും ആശങ്കാ ജനകമാണ്.
അന്തരീക്ഷ മലിനീകരണം മൂലം രൂപപ്പെടുന്ന ആന്ത്രോപോജെനിക് എയറോസോളു (അന്തരീക്ഷത്തിലെ കൃത്രിമ ജലകണങ്ങള്) കളാണ് മണ്സൂണിനു ഭീഷണി സൃഷ്ടിക്കുന്നത് . ഇന്ത്യന് മഹാസമുദ്രത്തിലൂടെ വടക്കോട്ടു വീശുന്ന കാറ്റാണ് മണ്സൂണിനു കാരണമാകുന്നത്. അന്തരീക്ഷ മലിനീകരണം വരും വര്ഷങ്ങളില് രാജ്യത്താകെ തെക്കു-പടിഞ്ഞാറന് മണ്സൂണില് 10 മുതല് 15 ശതമാനം വരെ കുറവുണ്ടാക്കുമെന്നാണ് ഐഐടി ഡെല്ഹിയിലെ സെന്റര് ഫോര് അറ്റ്മോസ്ഫെറിക് സയന്സിലെ ഡോ. ദിലീപ് ഗാംഗുലി ചൂണ്ടിക്കാട്ടുന്നത് .ചില പ്രദേശങ്ങളില് മഴക്കുറവ് 50 ശതമാനം വരെയാകാമെന്നും പഠനം പറയുന്നു.
ഐഐടി കാണ്പൂരിലെ സിവില് എന്ജിനിയറിംഗ് വിഭാഗം തലവന് എസ്.എന്.ത്രിപാദി പറയുന്നത് കൂടുതല് മലിനീകരണമുള്ള പ്രദേശങ്ങളില് ഈ പ്രതിഭാസം കൂടുതല് രൂക്ഷമാകുമെന്നാണ്. കരയിലെയും കടലിലെയും താപവ്യതിയാനം മൂലമാണ് മണ്സൂണ് കാറ്റ് സൃഷ്ടിക്കപ്പെടുന്നത്. അന്തരീക്ഷ മലിനീകരണം ഇതിനെ ബാധിക്കും. – അദ്ദേഹം പറഞ്ഞു . അന്തരീക്ഷ മലിനീകരണം മണ്സൂണിനെ ബാധിക്കുന്നതു സംബന്ധിച്ചു യൂറോപ്യന് സാഹചര്യങ്ങള് വിലയിരുത്തി നേരത്തെ യുഎന്നിന്റെ ഇന്റര് ഗവര്മെന്റല് പാനല് ഓണ് ക്ലൈമറ്റ് ചേഞ്ച് പഠനങ്ങള് നടത്തിയിരുന്നു.