![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: കോവിഡ് രണ്ടാം തരംഗത്തില്‍ നിന്നും രാജ്യം ഇനിയും മോചിതമായിട്ടില്ലെന്ന് കേന്ദ്ര ആരോഗ്യമന്ത്രാലയം. ദീപാവലി, ഗണേശ ചതുര്‍ഥി തുടങ്ങിയ ആഘോഷങ്ങളില്‍ ജാഗ്രത പുലര്‍ത്തണമെന്നും നിര്‍ദേശിച്ചു. വ്യാഴാഴ്ചയാണ് ആരോഗ്യമന്ത്രാലയത്തിന്റെ നിര്‍ദേശം പുറത്ത് വന്നത്.
ഗണേശ ചതുര്‍ഥി, ദീപാവലി തുടങ്ങിയവ കഴിഞ്ഞ വര്‍ഷത്തേത് പോലെ തന്നെ ഈ വര്‍ഷവും ആഘോഷിക്കാം. ജനങ്ങള്‍ ഇത്തവണയും ആഘോഷ ദിവസങ്ങളില്‍ വീടുകളില്‍ തന്നെ കഴിയണമെന്ന് നീതി ആയോഗ് അംഗം വി.കെ.പോള്‍ പറഞ്ഞു. നിയന്ത്രിതമായി മാത്രമേ ആഘോഷങ്ങളില്‍ പങ്കെടുക്കാവു. പൊതുസ്ഥലത്തേക്ക് പോവുകയാണെങ്കില്‍ നിര്‍ബന്ധമായി മാസ്ക് ധരിക്കണം. വിവിധ പ്രദേശങ്ങളിലെ കോവിഡ് നിയന്ത്രണങ്ങള്‍ പാലിക്കാന്‍ ജനങ്ങള്‍ തയാറാവണം.
രണ്ട് മാസത്തിനിടയിലെ ഏറ്റവും ഉയര്‍ന്ന നിരക്കിലേക്ക് രാജ്യത്തെ കോവിഡ് രോഗികളുടെ എണ്ണം വ്യാഴാഴ്ച എത്തിയിരുന്നു. രോഗികളില്‍ 70 ശതമാനവും കേരളത്തിലാണ്. അതേസമയം, കേരളത്തിലെ കോവിഡ് വ്യാപനം മറ്റ് സംസ്ഥാനങ്ങളിലുണ്ടാവാതിരിക്കാന്‍ ജാഗ്രത പുലര്‍ത്തുമെന്ന് കേന്ദ്ര ആരോഗ്യമന്ത്രി മന്‍സൂഖ് മാണ്ഡവ്യ പറഞ്ഞു.
