കക്കാട്ടാറില് കയാക്കിങ് ട്രയല് റണ്
കോന്നി: മലയോര നാടിന്റെ ടൂറിസം പ്രതീക്ഷകള്ക്ക് ചിറകുപകര്ന്ന് കക്കാട്ടാറില് കയാക്കിങ് ട്രയല് റണ് നടന്നു. അഡ്വഞ്ചര് ടൂറിസം രംഗത്ത് അന്തര്ദേശീയ ശ്രദ്ധനേടാന് കഴിയുന്ന കായികവിനോദത്തിനാണ് തുടക്കമായത്. കോന്നി ടൂറിസം ഗ്രാമം പദ്ധതിയുടെ ഭാഗമായി ആരംഭിക്കാന് പോകുന്ന വിവിധ പദ്ധതികളുടെ ഭാഗമായാണ് സീതത്തോട്ടില് കയാക്കിങ് ആരംഭിക്കുന്നത്.
ആങ്ങമൂഴിയിലെ കൊച്ചാണ്ടി കിളിയെറിഞ്ഞാംകല്ലിലാണ് ട്രയല് റണ്ണിെന്റ ഫ്ലാഗ് ഓഫ് നടന്നത്. ഇവിടെനിന്ന് അഞ്ച് കിലോമീറ്റര് യാത്ര ചെയ്ത് പവര്ഹൗസ് ജങ്ഷനില് വരെയാണ് കയാക്കിങ് നടത്തുന്നത്. കയാക്കിങ് വിദഗ്ധന് നോമി പോളിന്റെ നേതൃത്വത്തില് നിഥിന് ദാസ്, വിശ്വാസ് രാജ്, കെവിന് ഷാജി, ഷിബു പോള് എന്നിവരുള്പ്പെട്ട അഞ്ചംഗ സംഘമാണ് ട്രയല് റണ്ണിനെത്തിയത്. ഒരാള്ക്കുവീതം സാഹസികയാത്ര ചെയ്യാന് കഴിയുന്ന കയാക്കുകളാണ് ട്രയല് റണ്ണില് പങ്കെടുത്തത്. രണ്ടുമുതല് എട്ടുവരെ ആളുകള്ക്ക് യാത്രചെയ്യാന് കഴിയുന്ന കയാക്കുകളും സീതത്തോട്ടില് ഉപയോഗിക്കാന് കഴിയുമെന്ന് കയാക്കിങ് സംഘം അഭിപ്രായപ്പെട്ടു.
കയാക്കിങ്ങിനൊപ്പം റാഫ്റ്റിങ്, കനോയിങ് തുടങ്ങിയവയും സീതത്തോട് കേന്ദ്രത്തില് ആരംഭിക്കാനാണ് പദ്ധതിയിടുന്നത്.
കേരളത്തില് കോഴിക്കോട് ജില്ലയിലെ തുഷാരഗിരിയിലാണ് കയാക്കിങ് സെന്റര് നിലവില് പ്രവര്ത്തിക്കുന്നത്. ദീര്ഘദൂര, ഹ്രസ്വദൂരയാത്രകള്ക്കും സാഹസിക യാത്രകള്ക്കും ഇന്ത്യയില് ലഭ്യമായതില്െവച്ച് മികച്ച സൗകര്യമാണ് സീതത്തോട്ടിലെ കക്കാട്ടാറില് ഉള്ളത്. കുളു, മണാലി കേന്ദ്രങ്ങളെക്കാള് മികച്ച നിലയില് സീതത്തോടിന് മാറാന് കഴിയുമെന്നാണ് സംഘം പറയുന്നത്. സഞ്ചാരികള്ക്കായി സാഹസികത കുറഞ്ഞ ഹ്രസ്വദൂര യാത്രകള് നടത്താനും സൗകര്യമൊരുക്കും. സാഹസികത ഇഷ്ടപ്പെടുന്ന യുവാക്കളുടെ പ്രധാന കേന്ദ്രമായി സീതത്തോടിനെ മാറ്റാനാണ് പദ്ധതി തയാറാകുന്നത്. അഡ്വ. കെ.യു. ജനീഷ്കുമാര് എം.എല്.എ, കലക്ടര് ദിവ്യ എസ്.അയ്യര് എന്നിവര് ചേര്ന്ന് ട്രയല് റണ് ഫ്ലാഗ്ഓഫ് ചെയ്തു. ഗ്രാമപഞ്ചായത്ത് പ്രസിഡന്റ് ജോബി ടി.ഈശോ അധ്യക്ഷതവഹിച്ചു. ജില്ല പഞ്ചായത്ത് അംഗം ലേഖ സുരേഷ്, ചിറ്റാര് ഗ്രാമപഞ്ചായത്ത് പ്രസിഡന്റ് സജി കുളത്തുങ്കല്, ടൂറിസം ഡെപ്യൂട്ടി ഡയറക്ടര് പി.ഐ. സുബൈര് കുട്ടി, ബ്ലോക്ക് പഞ്ചായത്ത് വൈസ് പ്രസിഡന്റ് പി.എസ്. സുജ, പി.ആര്. പ്രമോദ്, രവികല എബി, രവി കണ്ടത്തില്, റെയ്സണ് വി.ജോര്ജ്, രമേശ് രംഗനാഥ്, ബിയോജ്, രാജേഷ് ആക്ലേത്ത്, ബിനോജ്, എസ്. ഹരിദാസ് തുടങ്ങിയവര് പങ്കെടുത്തു.