അഞ്ചരക്കണ്ടി: ആലപ്പുഴയിലും കുട്ടനാട്ടിലും പോവേണ്ട, ഹൗസ് ബോട്ടിലൂടെ യാത്ര ആഗ്രഹിക്കുന്ന കണ്ണൂരുകാര്ക്ക് വേങ്ങാട് കാവുംപള്ളയിലെ കരിങ്കല് ക്വാറിയിലെത്തിയാല് മതി. വേങ്ങാട് ഗംഗോത്രിയില് ജയരാജന് കൂര്മയാണ് ‘ജലകന്യക’ എന്ന പേരില് ക്വാറിയില് ഒഴുകുന്ന വീട് ഒരുക്കിയത്. പൂര്ണമായും പ്രകൃതിഭംഗിയുടെ പശ്ചാത്തലത്തിലുള്ള വീട് ആരെയും ആകര്ഷിക്കും.
2019 മുതല് ജയരാജന് കൂര്മ ക്വാറിയില് ശുദ്ധജല കൂടുമത്സ്യകൃഷി ചെയ്യുന്നുണ്ട്. അങ്ങനെയാണ് ടൂറിസം സാധ്യത ഉപയോഗപ്പെടുത്താന് പറ്റാവുന്ന രീതിയില് ഒഴുകുന്ന വീടെന്ന ആശയം ഉദിച്ചത്. മത്സ്യകൃഷിയുടെ ഭാഗമായുള്ള കൂടില് ബാരലുകള് ഘടിപ്പിച്ചാണ് ഒഴുകിനടക്കുന്ന വീട് ഒരുക്കിയത്.12 ബാരലുകളാണ് ഘടിപ്പിച്ചത്. സുഹൃത്തുക്കളുടെ സഹായത്തോടെ ഒരുക്കിയ വീടിന് ഒന്നര ലക്ഷത്തോളം രൂപ ചെലവായി. ആവശ്യക്കാര്ക്ക് ഇവിടെ വന്ന് മീന്പിടിച്ച് പാകം ചെയ്ത് കഴിക്കാനും പ്രകൃതിസൗന്ദര്യം ആസ്വദിച്ച് കുറച്ച് സമയം ചെലവഴിക്കാനുമുള്ള സൗകര്യം ഒരുക്കുക എന്നതാണ് ഒഴുകിനടക്കുന്ന വീടുകൊണ്ട് ഉദ്ദേശിക്കുന്നതെന്ന് ജയരാജന് പറഞ്ഞു.
ടൂറിസം വകുപ്പിന്റെ അനുമതി ലഭിക്കുകയാണെങ്കില് ഇത്തരത്തില് കൂടുതല് വീടുകള് നിര്മിക്കാനും പദ്ധതിയുണ്ട്. അഞ്ചു കൂടുകളിലായി തിലോപ്പിയ മത്സ്യമാണ് കൃഷി ചെയ്യുന്നത്. 3000 മത്സ്യക്കുഞ്ഞുങ്ങളെ ഫിഷറീസ് വകുപ്പ് സൗജന്യമായാണ് ജയരാജന് നല്കിയത്. ഒട്ടനവധി പേരാണ് ജയരാജന്റെ മത്സ്യകൃഷിയിടത്തില് ദിനേന മത്സ്യം വാങ്ങുന്നതിനും മറ്റുമായി എത്തുന്നത്.