ദുബൈ: മുതലാളിമാര്ക്ക് ജീവനക്കാരോട് ഇഷ്ടം തോന്നുന്നത് എപ്പോഴും സംഭവിക്കുന്ന കാര്യമല്ല. ഇഷ്ടം തോന്നിയാല് തന്നെ തുറന്നുപറയാനോ സമ്മാനം കൊടുക്കാനോ മുതിരുന്ന മുതലാളിമാരും കുറവാണ്. എന്നാല്, ദുബൈയില് ഒരു മുതലാളി തന്റെ ഡ്രൈവറുടെ മികച്ച സേവനത്തിന് സര്പ്രൈസ് ഗിഫ്റ്റായി നല്കിയത് ഫോര്ഡ് കാറും സൈക്കിളും. മലപ്പുറം കുറ്റിപ്പുറം സ്വദേശിയായ ഇസ്മായിലാണ് സര്പ്രൈസ് കിട്ടിയ വ്യക്തി. ജര്മന് സ്വദേശിയും ബിസിനസുകാരനുമായ ഡെന്നിസ് ലൂയിസാണ് തന്റെ ഡ്രൈവറെ വമ്പന് ഗിഫ്റ്റ് നല്കി ഞെട്ടിച്ചത്.
കഴിഞ്ഞ 16 വര്ഷമായി ദുബൈയില് പ്രവാസിയായ ഇസ്മായില് വിവിധ സ്ഥാപനങ്ങളില് ഡ്രൈവറായി ജോലി ചെയ്തിട്ടുണ്ട്. മൂന്നു വര്ഷം മുമ്പ് മാത്രമാണ് ഡെന്നിസിന്റെ ഡ്രൈവറായി ജോലിയില് പ്രവേശിച്ചത്. വളരെ തിരക്കിട്ട ബിസിനസ് കൈകാര്യം ചെയ്യുന്ന ഡെന്നിസിന് കൂടെയുള്ളവര് കൃത്യനിഷ്ഠയും ആത്മാര്ഥതയും ഉള്ളവരാകണമെന്നത് നിര്ബന്ധമാണ്. ഇസ്മായിലിനെ കുറിച്ച് കഴിഞ്ഞ മൂന്നു വര്ഷത്തെ അനുഭവത്തില് പൂര്ണ തൃപ്തനാണിദ്ദേഹം. ഈ സേവനത്തിന് തിരിച്ചെന്തെങ്കിലും നല്കലാണ് സമ്മാനത്തിലൂടെ ഉദ്ദേശിച്ചതെന്ന് ഡെന്നിസ് ഇന്സ്റ്റഗ്രാമില് പങ്കുവെച്ച വിഡിയോയില് പറയുന്നു.
സ്ഥിരമായി സൈക്കിള് റൈഡിങ് ചെയ്യുന്ന ഡെന്നിസ്, ഇസ്മായിലിന് ഇതിലെ താല്പര്യം തിരിച്ചറിഞ്ഞാണ് സൈക്കിള് സമ്മാനമായി നല്കാന് തീരുമാനിച്ചത്. പ്രത്യേകിച്ച് മുന്നറിയിപ്പൊന്നും നല്കാതെയാണ് സൈക്കിള് ഷോറൂമിലേക്ക് ഡ്രൈവറെ ഇദ്ദേഹം വിളിച്ചുകൊണ്ടുപോയത്. റൈഡിങ്ങിന് ഉപയോഗിക്കുന്ന വിലകൂടിയ സൈക്കിള് ലഭിച്ചപ്പോള് തന്നെ ഇസ്മായില് ആശ്ചര്യപ്പെട്ടു. തുടര്ന്നാണ് നിനക്ക് ഒരു കാര്യം കൂടി കരുതിവെച്ചിട്ടുണ്ട് എന്ന് പറഞ്ഞ് ഡെന്നിസ് സൈക്കിള് ഷോറൂമിന് മുന്നില് നിര്ത്തിയിട്ട കാറിനടുത്തേക്ക് കൊണ്ടുപോകുന്നത്. കാറില്ലാതെ സൈക്കിള് മാത്രമായിട്ട് കാര്യമില്ല എന്നും പറഞ്ഞ് കീ കൈമാറിയതോടെ അക്ഷരാര്ഥത്തില് ഇസ്മായിലിന്റെറ കണ്ണുതള്ളി.
ഇതാദ്യമായല്ല ഇസ്മായിലിന് ഡെന്നിസിെന്റ സമ്മാനം ലഭിക്കുന്നത്. കഴിഞ്ഞ ജന്മദിനത്തില് ഐ ഫോണും വാച്ചുമാണ് സമ്മാനമായി നല്കിയത്. മുതലാളിക്ക് തൊഴിലാളിയെ കുറിച്ച് പറയാനുള്ളത് പോലെ, തിരിച്ചും നല്ലത് മാത്രമാണ് അനുഭവിക്കാനായതെന്ന് ഇസ്മായില് പറയുന്നു. വളരെ മാന്യമായ പെരുമാറ്റവും മറ്റുള്ളവരെ പരിഗണിക്കുന്ന സ്വഭാവവും തന്റെ മുതലാളിയുടെ പ്രത്യേകതയാണെന്ന് അദ്ദേഹം പറഞ്ഞു. സമൂഹ മാധ്യമത്തിലൂടെ ഡെന്നിസ് പങ്കുവെച്ച സമ്മാനം കൈമാറുന്ന വിഡിയോ വൈറലായതോടെ ധാരാളം ആളുകള് വിശേഷങ്ങള് അന്വേഷിച്ച് വിളിക്കുന്നുണ്ടെന്നും ഇസ്മായില് കൂട്ടിച്ചേര്ത്തു. ദുബൈ റാശിദിയ്യയില് കുടുംബസമേതമാണ് ഇദ്ദേഹം കഴിയുന്നത്.