കൊച്ചി: കേരള-ലക്ഷദ്വീപ് സന്ദര്ശനത്തിനായി ഉപരാഷ്ട്രപതി വെങ്കയ്യ നായിഡു ഇന്നു കൊച്ചിയിലെത്തും. രാവിലെ 10.05ന് നാവിക വിമാനത്താവളത്തിലെത്തുന്ന അദ്ദേഹം 10.15ന് ലക്ഷദ്വീപിലേക്ക് പുറപ്പെടും.ശനിയാഴ്ച ലക്ഷദ്വീപില് കടമത്ത്, ആന്ത്രോത്ത് ദ്വീപുകളിലെ ആര്ട്സ് ആന്ഡ് സയന്സ് കോളേജിന്റെ ഉദ്ഘാടനം നിര്വ്വഹിക്കും.
ജനുവരി രണ്ടിന് ലക്ഷദ്വീപില്നിന്നു മടങ്ങിയെത്തുന്ന ഉപരാഷ്ട്രപതി രാവിലെ 11.25ന് കൊച്ചി കപ്പല്ശാലയില്, ഇന്ത്യ തദ്ദേശീയമായി നിര്മ്മിക്കുന്ന വിമാനവാഹിനിക്കപ്പലായ ഐഎന്എസ് വിക്രാന്ത് സന്ദര്ശിക്കും. കാക്കനാട്ടുള്ള എന്.പി.ഒ.എല്ലില് ട്രോവ്ഡ് അരെയ് ഇന്റഗ്രേഷന് ഫെസിലിറ്റിയുടെ ശിലാസ്ഥാപനം നിര്വ്വഹിക്കും. തിങ്കളാഴ്ച കോട്ടയം മാന്നാനം സെന്റ് എഫ്രേംസ് ഹയര് സെക്കന്ഡറി സ്കൂളില് സെന്റ് കുര്യാക്കോസ് ഏലിയാസ് ചാവറയുടെ 150-ാം ചരമവാര്ഷികച്ചടങ്ങില് മുഖ്യാതിഥിയാകും. ഉച്ചയോടെ കൊച്ചിയിലെത്തി രണ്ട് പരിപാടികളില് പങ്കെടുക്കും.