ബ്രോഡാഡിയിലെ ആദ്യഗാനം പുറത്തിറങ്ങി
മോഹൻലാൽ ചിത്രം ബ്രോഡാഡിയിലെ ആദ്യഗാനം പുറത്തിറങ്ങി. പ്രണയവും നർമവും ഇടകലർത്തി അവതരിപ്പിച്ചിരിക്കുന്ന ‘പറയാതെ വന്നെൻ’ എന്നുതുടങ്ങുന്ന ഗാനം വിനീത് ശ്രീനിവാസനും എം.ജി ശ്രീകുമാറും ചേർന്നാണ് ആലപിച്ചിരിക്കുന്നത്. ലക്ഷ്മി ശ്രീകുമാർ എഴുതിയ വരികൾക്ക് ഈണം നൽകിയിരിക്കുന്നത് ദീപക് ദേവാണ്.
സിനിമയുടെ ട്രെയിലർ പുറത്തിറങ്ങിയതിന് ശേഷം ആദ്യമായാണ് ചിത്രത്തിലെ ഒരു ഗാനം പ്രേക്ഷകരുടെ മുമ്പിലേക്കെത്തുന്നത്. ഗാനരംഗങ്ങളിൽ മോഹൻലാൽ-മീന ദമ്പതികളെയും, പൃഥ്വിരാജ് സുകുമാരൻ- കല്യാണി പ്രിയദർശൻ ജോഡികളെയും ചിത്രീകരിച്ചിട്ടുണ്ട്.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രം പൃഥ്വിരാജാണ് സംവിധാനം ചെയ്യുന്നത്. കേന്ദ്രകഥാപാത്രമായെത്തുന്ന മോഹൻലാലിനോടൊപ്പം സഹതാരമായെത്തുന്നത് മീനയാണ്. അതേസമയം കല്യാണി പ്രിയദർശൻ-പൃഥ്വിരാജ് ജോഡികളുടെ ആദ്യചിത്രമാണ് ബ്രോഡാഡി. ഡിസ്നി പ്ലസ് ഹോട്ട്സ്റ്റാറിലൂടെ ജനുവരി 26നാണ് ചിത്രത്തിന്റെ റിലീസ്.