ദൃശ്യങ്ങൾ ചോർന്നതിൽ സമഗ്രമായ അന്വേഷണം വേണം

തിരുവനന്തപുരം : ആക്രമിക്കപ്പെട്ടതിന്റെ ദൃശ്യം ചോർന്നെന്ന വാർത്തകളിൽ അന്വേഷണം വേണമെന്ന് ആവശ്യപ്പെട്ട് ആക്രമണത്തിനിരയായ നടി ഡിജിപിക്ക് പരാതി നൽകി. ദൃശ്യങ്ങൾ ചോർന്നതിൽ സമഗ്രമായ അന്വേഷണം ആവശ്യപ്പെട്ടാണ് നടി ഡി.ജി.പിക്ക് പരാതി നൽകിയിരിക്കുന്നത്. നേരത്തെ ഇതേ വിഷയത്തിൽ നടി രാഷ്‌ട്രപതിക്കും പ്രധാനമന്ത്രിക്കും കത്തെഴുതിയിരുന്നു.

മുഖ്യമന്ത്രി, സുപ്രീം കോടതി ജഡ്ജി, ഹൈക്കോടതി ജഡ്ജി, കേന്ദ്ര വിജിലൻസ് കമ്മീഷണർ, കേന്ദ്ര-സംസ്ഥാന വനിത കമ്മീഷണർ എന്നിവർക്കും നടി കത്ത് നൽകിയിരുന്നു. അടിയന്തിര നടപടി വേണമെന്നാവശ്യപ്പെട്ടാണ് കത്ത് അയച്ചത്.

താൻ ആക്രമിക്കപ്പെട്ടതിന്റെ ദൃശ്യങ്ങൾ എറണാകുളം സെഷൻസ് കോടതിയിൽ നിന്നും ചോർന്നുവെന്ന വാർത്തകൾ പുറത്ത് വരുന്നുണ്ട്. ഇതിൽ അന്വേഷണം വേണമെന്നാണ് കത്തിൽ പ്രധാനമായും ആവശ്യപ്പെട്ടിരിക്കുന്നത്. വിദേശത്തുള്ള ചില ആളുകളിൽ ദൃശ്യങ്ങൾ എത്തിയെന്ന വാർത്തകളും ഇതിനൊപ്പം പ്രചരിക്കുന്നുണ്ട്.

ദൃശ്യം അനുമതിയില്ലാതെ തുറന്നത് ഞെട്ടിക്കുന്ന സംഭവമാണെന്നും നടി കത്തിൽ പറഞ്ഞിരുന്നു. തന്റെ സ്വകാര്യതയെ ഹനിക്കുന്ന സംഭവമാണിത്. കോടതിയിൽ നിന്നും നീതി പ്രതീക്ഷിച്ചുകൊണ്ടിരിക്കുന്ന ഒരു വ്യക്തിയാണ് താൻ. സംഭവത്തിൽ വിശദമായ അന്വേഷണം വേണമെന്നും നടി ആവശ്യപ്പെട്ടിട്ടുണ്ട്.

2019 ഡിസംബറിലാണ് ദൃശ്യങ്ങൾ ചോർന്നതായി വിചാരണ കോടതി സ്ഥിരീകരിച്ചത്. സംസ്ഥാന ഫോറൻസിക് വിഭാഗമായിരുന്നു ഇക്കാര്യം വെളിപ്പെടുത്തിയത്. എറണാകുളം സെഷൻസ് കോടതിയിൽ നിന്നും വിചാരണ കോടതിയിലേയ്‌ക്ക് എത്തിച്ചപ്പോഴാണ് ദൃശ്യങ്ങൾ ചോർന്നതെന്നാണ് സൂചന.