പാർലമെന്റിൽ പ്രതിഷേധം; ഇരുസഭകളും ഓഗസ്റ്റ് 1 വരെ പിരിഞ്ഞു

ന്യൂ ഡൽഹി: ‘രാഷ്ട്രപത്‌നി’ പരാമർശത്തെ തുടർന്ന് പാർലമെന്‍റിന്‍റെ ഇരുസഭകളുടെയും പ്രവർത്തനം വീണ്ടും തടസ്സപ്പെട്ടു. ലോക്സഭാ സമ്മേളനം ആരംഭിച്ചതിന് തൊട്ടുപിന്നാലെ സോണിയാ ഗാന്ധി സ്മൃതി ഇറാനി വാക്കേറ്റം ചര്‍ച്ച ചെയ്യണമെന്ന് കോൺഗ്രസ് നേതാക്കൾ ആവശ്യപ്പെട്ടിരുന്നു. ഇതിന് സ്പീക്കർ അനുമതി നിഷേധിച്ചതോടെ പ്രതിപക്ഷം നടുത്തളത്തിലിറങ്ങി ബഹളമുണ്ടാക്കി. ബഹളത്തെ തുടർന്ന് സഭാ നടപടികൾ ഉച്ചയ്ക്ക് 12 മണി വരെ നിർത്തിവയ്ക്കേണ്ടി വന്നു. സഭാനടപടികൾ പുനരാരംഭിച്ചെങ്കിലും പ്രതിപക്ഷ ബഹളത്തെ തുടർന്ന് പാർലമെന്‍റിന്‍റെ ഇരുസഭകളും ഓഗസ്റ്റ് 1 വരെ പിരിഞ്ഞു.
വെള്ളിയാഴ്ചയും പാർലമെന്‍റ് നടപടികൾ ആരംഭിച്ചയുടൻ പാർലമെന്‍റിന്‍റെ ഇരുസഭകളിലും ബഹളമുണ്ടായി. സോണിയ ഗാന്ധിയും അധീർ രഞ്ജൻ ചൗധരിയും മാപ്പുപറയണമെന്ന മുദ്രാവാക്യം ഭരണകക്ഷി എംപിമാർ ലോക്സഭയിൽ ഉയർത്തിയപ്പോൾ വിലക്കയറ്റം പോലുള്ള പ്രധാന വിഷയങ്ങൾ ചർച്ച ചെയ്യാതെ എംപിമാരെ സസ്പെൻഡ് ചെയ്തതിനെതിരെ പ്രതിപക്ഷം മുദ്രാവാക്യം മുഴക്കി. അധീർ രഞ്ജൻ ചൗധരി ഇതുവരെ മാപ്പ് പറഞ്ഞിട്ടില്ലെന്ന് പാർലമെന്‍ററി കാര്യ മന്ത്രി പ്രഹ്ലാദ് ജോഷി പറഞ്ഞു.
ദ്രൗപദി മുർമുവിനെ പ്രസിഡന്‍റ് സ്ഥാനാർത്ഥിയായി പ്രഖ്യാപിച്ചപ്പോഴും കോൺഗ്രസിൽ നിന്ന് മോശം പ്രസ്താവനയാണ് ഉണ്ടായതെന്ന് അദ്ദേഹം പറഞ്ഞു. അധീർ രഞ്ജൻ ചൗധരിയുടെ പ്രസ്താവനയിൽ സോണിയ ഗാന്ധി മാപ്പ് പറയണമെന്നും ജോഷി ആവശ്യപ്പെട്ടു. വ്യാഴാഴ്ചയും പാർലമെന്‍റിന്‍റെ ഇരുസഭകളിലും ബഹളമുണ്ടായിരുന്നു. അധീറിന്‍റെ പ്രസ്താവനയെച്ചൊല്ലിയുള്ള തർക്കത്തിനിടയിൽ കോൺഗ്രസ് അധ്യക്ഷ സോണിയ ഗാന്ധിയും കേന്ദ്രമന്ത്രി സ്മൃതി ഇറാനിയും തമ്മിലുള്ള തർക്കവും ചർച്ചയായിരുന്നു. അധീർ രഞ്ജൻ ചൗധരി രാഷ്ട്രപതി ദ്രൗപദി മുർമു എന്ന വാക്ക് ഒരു ടിവി ചാനലുമായുള്ള സംഭാഷണത്തിൽ പത്നി എന്ന് ഉപയോഗിച്ചിരുന്നു. എന്നാൽ, വിവാദമായപ്പോൾ അബദ്ധത്തിൽ ആ വാക്ക് തന്നിൽ നിന്ന് വന്നതാണെന്ന് അദ്ദേഹം പറഞ്ഞു.